އެއިޑްސް އާ ދެކޮޅަށް ކުރާ ކެމްޕޭނަށް ފައިސާ ހޯދުމުގެ ގޮތުން، އެ ބައްޔާ ދެކޮޅަށް މަސައްކަތް ކުރާ ހޮލީވުޑްގެ ބަތަލާ ޝެރޯން ސްޓޯން އިންޑިއާގައި ބާއްވާ ފަންޑް ރައިޒިން އިވެންޓްގައި ބޮލީވުޑްގެ ދެމަފިރިން ކަމަށްވާ އަބިޝެކް ބައްޗަން އާއި އައިޝްވާރިއާ ރާއީ ބައްޗަން ބައިވެރިވާ ގޮތަށް ހަމަޖެހިއްޖެ އެެވެ.
މި ދެ ތަރިންނަކީ ވެސް އެއިޑްސް އާ ދެކޮޅަށް ޔޫއެން އިން ހިންގާ ކެމްޕޭނުގެ ހާއްސަ ދައުރެެއް އަދާ ކުރާ ދެ ފަންނާނުންނެވެ.
މުމްބާއީގެ ތާޖް މަހަލް ޕަލަސްގައި ބާއްވާ އިވެންޓް ޝެރޯން ހޯސްޓް ކުރާ އިރު، އޭޝް އާއި އަބިޝެކް އަދާ ކުރާނީ ކޯ-ހޯސްޓުންގެ ދައުރެވެ.
މި އިވެންޓާ ބެހޭ ގޮތުން ވާހަަކަ ދައްކަމުން ޝެރޯން ބުނީ އިންޑިއާ އަށް ދިއުމުން އެ ގައުމުން ކީ ހޫނު މަރުހަބާއަށް ވަރަށް ބޮޑަށް ޝުކުރު އަދާ ކުރާ ކަމަށެވެ. އަދި އިންޑިއާގައި މިފަދަ އިންޑިއާގެ ރައްޔިތުންނަށް ވެސް އަމާޒުކޮށްގެން ބޭއްވޭކަމީ ލިބޭ ވަރަށް ބޮޑު އުފަލެއް ކަމަށް ޝެރޯން ބުންޏެވެ.
"ބޭސިކް އިންސްޓިންކްޓް" އާއި "ލަވްލޭސް" ފަދަ ފިލްމްތަކުގެ ބަތަލާ ޝެރޯން އާ އެކު މި އިވެންޓްގައި ހޮލީވުޑްގެ މަޝްހޫރު ރެކޯޑިން އާޓިސްޓް ކޭޝާ ވެސް ބައވެރި ޕަފޯމް ކުރާ ގޮތަށް ވަނީ ހަމަޖެހިފަ އެވެ.
ފައިސާ ހޯދަން ބާއްވާ އިވެންޓް ކުރިއަށް ދާނީ ޑިނާއަކާ އެކު ބާއްވާ މައުރަޒަކާ ވެސް އެކުގަ އެވެ.
މި އިވެންޓްގައި ބޮލީވުޑްގެ ވަރަށް ގިނަ ފަންނާނުން ބައިވެރިވާ ގޮތަށް ވަނީ ހަމަޖެހިފަ އެވެ.