އަންނަ އެޕްރީލް މަހުގެ 10 ވަނަ ދުވަހު ބާއްވާ ލޯކަލް ކައުންސިލް އިންތިހާބުގައި ވޯޓުލުމަށް 26،000 އަށް ވުރެ ގިނަ މީހުން ރީ-ރަޖިސްޓްރީ ވެއްޖެއެވެ.
އިލެކްޝަން ކަމިޝަންގެ ރައީސް އަހުމަދު ޝަރީފު ވިދާޅުވީ ލޯކަލް ކައުންސިލް އިންތިހާބުގައި ވޯޓުލުމަށް ރީ-ރަޖިސްޓްރީ ވުމަށް ހުޅުވާލި ފުރުސަތު އިއްޔެގެ ނިޔަލަށް ހަމަވި އިރު 26750 މީހުން ފޯމު ހުށަހަޅާފައިވާ ކަމަށެވެ. އަދި މިއީ ކޮވިޑު-19 އާއި ގުޅިގެން ފަސްކުރެވުނު އިންތިހާބުގައި ރީރަޖިސްޓްރީވީ އަދަދަށް ވުރެ އިތުރު އަދަދެއްކަމަށް ޝަރީފު ވިދާޅުވިއެވެ.
ޝަރީފު ވިދާޅުވީ ރީ-ރަޖިސްޓްރީ ވުމަށް އިތުރު ފުރުސަތު ދީފިނަމަ އިންތިހާބު ބާއްވަން ކަނޑައެޅިފައިވާ ތާރީހުގައި ބޭއްވުމަށް ހުރަސްތަކެއް ކުރިމަތިވާނެ ކަމަށެވެ. އެހެންވެ އިތުރު ފުރުސަތެއް މިފަހަރު ދިނުމަށް ނިންމާފައި ނުވާކަމަށެވެ.
މި ފަހަރުގެ ލޯކަލް ކައުންސިލް އިންތިާބު ކުރިއަށްގެންދިއުމަށް ނިންމާފައިވަނީ އެޗްޕީއޭއިން ކަނޑައަޅާ ހާއްސަ ގައިޑުލައިން އާއި އެއްގޮތަށް ގައި ދުުރުކަން ބަހައްޓައި، ކޮވިޑު-19 ފެތުރުން ކޮންޓްރޯލް ކުރުވޭނެ އިންތިޒާމާއި އެކުއެވެ. އެއާއި އެކު މި ފަހަރުގެ އިންތިހާބުގައި ވޯޓުލުމަށް ބަހައްޓަން ޖެހޭ ފޮށީގެ އަދަދުވެސް ވަނީ އިތުރުވެފައެވެ.