މާދަމާ ބާއްވާނެ ކަމަށް ބެލެވޭ ރިޔާސީ އިންތިޚާބުގައި ވޯޓު ލާ މީހުންގެ މަޢުލޫމާތު ހިމެނޭ ލިސްޓުތަކުގައި އެމްޑީޕީގެ ރިޔާސީ ކެންޑިޑޭޓް ރައީސް މުޙައްމަދު ނަޝީދު ސޮއި ކުރައްވައިފި އެވެ.
މިއަދު ހެނދުނު އިލެކްޝަންސް ކޮމިޝަނުގައި ނަޝީދު ވަނީ ރާއްޖޭން ބޭރުގައި ބަހައްޓާ ވޯޓު ފޮށިތަކުގެ ލިސްޓުތަކުގައި ސޮއިކުރައްވާފަ އެވެ.
ނަޝީދުގެ އަރިހުގައި އެ މަނިކުފާނުގެ ކެންޑިޑޭޓްގެ އޭޖެންޓް އަލްއުސްތާޛް ހަސަން ލަޠީފް އާއި އެމްޑީޕީގެ ސްކެޓްރީ ޖެނެރެލް ޝާޒްލީ ޝަފީޤާއި ޑެޕިއުޓީ ސެކެޓްރީ ޖެނެރެލް އަހްމަދު އަކްރަމް ވެސް ބައިވެރިވެވަޑައިގެން ވަނީ ލިސްޓުތަކުގައި ނަޝީދުގެ ފަރާތްޕުޅުން ސޮއިކުރައްވާފަ އެވެ.
ކޮންމެ ވޯޓު ފޮށްޓެއްގައި ބޭނުން ކުރެވޭ ވޯޓުލާ މީހުންގެ ލިސްޓުތަކުގައި ވެސް ސޮއި ކުރެއްވުން އިލެކްޝަންސް ކޮމިޝަނުގައި ކުރިއަށްދާނެއެވެ.
ނަޝީދުގެ އިތުރުން މި ލިސްޓުތަކުގައި އިލެކްޝްނަސް ކޮމިޝަނާއި އަދި ލިސްޓު އެކުލަވާލުމުގައި މަސްދަރުކަމުގައި ބެލެވިފައިވާ ޑިޕާޓްމެންޓް އޮފް ނެޝަނަލް ރެޖިސްޓްރޭޝަނުން ވެސް ވަނީ ސޮއި ކުރައްވާފައެވެ.
ރިޔާސީ އިންތިޚާބުގައި ވޯޓު ޙައްޤުވާ ކަމަށް އިލެކްޝަންސް ކޮމިޝަނުން ކަނޑައަޅާފައިވާ ލިސްޓުގައި ބައެއް ކުދި މައްސަލަތައް ހުރި ކަމުގައި ވީ ނަމަވެސް ޤާނޫނު އަސާސީ އިން 11 ނޮވެމްބަރު 2013 ގައި އިންތިޚާބީ އާ ރައީސެއް ހުންނަން ޖެހޭނެ ކަމަށް ބުނާތީ އެމްޑީޕީން ނިންމާފައި ވަނީ ރިޔާސީ އިންތިޚާބު އިތުރަށް ލަސް ނުކޮށް ހޮނިހިރު ދުވަހު ބޭއްވުމަށް ހަމަޖެހިފައިވާ އިންތިޚާބައިގެން ކުރިއަށް ދިއުމަށެވެ.
ނަޝީދު ލިސްޓްގައި ސޮއި ކުރެއްވި ނަމަވެސް އިންތިހާބުގައި ވާދަ ކުރައްވާ ޕީޕީއެމްގެ ކެންޑިޑޭޓް އަބްދުﷲ ޔާމީނާއި ޖުމްހޫރީ ގުުޅުމުގެ ކެންޑިޑޭޓް ގާސިމް އިބްރާހީމް އަދި ލިސްޓްގައި ސޮއެެއް ނުކުރައްވަ އެވެ.