އައްޑޫގެ މޮނިޓަރިން ހާލަތު ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިރޭ އުވާލައިފިއެވެ.
އެޗްޕީއޭއިން އައްޑޫގެ މޮނިޓަރިން ހާލަތު އުވާލައި ނެރުނު ބަޔާނުގައި ބުނީ ކޮވިޑު-19ގެ ރައްކާތެރިކަމުގެ ގޮތުން ބަލަން ކަނޑައެޅުނު ކަންކަން ބެލުމަށްފަހު، އައްޑޫ ސިޓީގައި މޮނިޓަރިން ހާލަތު އިތުރަށް ދަމަހައްޓަން ޖެހޭ ސަބަބެއް މިވަގުތު ނެތުމާއި އެކު އައްޑޫގެ މޮނިޓަރިންގެ ހާލަތު އުވާލާފައިވާ ކަމަށެވެ.
އައްޑޫ ސިޓީ މޮނިޓަރިންގެ ހާލަތަށް ގެނެސްފައިވަނީ މިދިޔަ ފެބްރުއަރީ މަހުގެ 2 ވަނަ ދުވަހު ހުޅުމީދޫ އެމްޓީސީސީ ސައިޓުގައި މަސައްކަތް ކުރާ ބިދޭސީންތަކެއް ކޮވިޑު-19 އަށް ޕޮޒިޓިވްވުމާއި ގުޅިގެންނެވެ. އޭގެ ފަހުން ފެބްރުއަރީ މަހުގެ 4 ވަނަ ދުވަހު އައްޑޫ އިކުއިޓޯރިއަލް ހޮސްޕިޓަލްގެ ފްލޫ ކްލިނިކަށް ދެއްކި 2 މީހަކު ކޮވިޑަށް ޕޮޒިޓިވްވުމާއި ގުޅިގެން ފެބްރުވަރީ 6 ވަނަ ދުވަހު މުޅި އައްޑޫ ސިޓީ މޮނިޓަރިން ހާލަތަށް ގެނެވުނެވެ.
އައްޑޫން އެންމެ ފަހުން ކޮވިޑު ކޭސްއެއް ފެނިފައިވަނީ މި މަހުގެ 4 ވަނަ ދުވަހުއެވެ. އޭގެ ފަހުން އައްޑޫން މީހަކު ކޮވިޑަށް ޕޮޒިޓިވްވެފައިނުވެއެވެ.
އައްޑޫން މިހާތަނަށް 93 މީހަކަށް ކޮވިޑަށް ޕޮޒިޓިވްވެފައިވާ އިރު އޭގެ ތެރެއިން މިހާރު ބަލި ޖެހިފައިތިބީ އެންމެ 6 މީހެކެވެ. ބާކީ އެންމެން ވަނީ ބަލިން ރަނގަޅުވެފައެވެ.
އައްޑޫގެ މޮނިޓަރިންގެ ހާލަތު އުވާލާފައިވާ އިރު މިހާތަނަށް 4889 މީހެއްގެ ސާމްޕަލް ވަނީ ނަގާފައެވެ.