މާދަމާ ބޭއްވޭނެ ކަމަށް ބެލެވޭ ރިޔާސީ އިންތިޚާބު، ްކޯޓުގެ ޙުކުމާ އެއްގޮތަށް، މިނިވަންކަމާއި އިންސާފުވެރިކަމާ އެކު ބޭއްވުމަށްޓަކައި ދެއްވަން ޖެހޭ ހުރިހާ އެހީތެރި ކަމެއް ދެއްވުމަށް ހުރިހާ ފަރާތްތަކަކަށް ރައީސް ޑރ. މުޙަންމަދު ވަޙީދު އިލްތިމާސް ކުރައްވައިފި އެވެ.
ރައީސް މިކަމަށް އިލްތިމާސް ކުރައްވާފައި ވަނީ މިއަދު ނެރުއްވި ނޫސްބަޔާނެއްގައެވެ.
"މާދަމާ، 2013 އޮކްޓޫބަރު 19 ވާ ހޮނިހިރު ދުވަހު ބޭއްވުމަށް ހަމަޖެހިފައިވާ ރިޔާސީ އިންތިޚާބު، ސުޕުރީމް ކޯޓުގެ ޙުކުމާ އެއްގޮތަށް، މިނިވަންކަމާއި އިންސާފުވެރިކަމާއެކު ބޭއްވުމަށްޓަކައި ދެއްވަން ޖެހޭ ހުރިހާ އެހީތެރި ކަމެއް ދެއްވުމަށް ހުރިހާ ފަރާތްތަކަކަށް އަޅުގަނޑު މި ފުރުޞަތުގައި އިލްތިމާސް ކުރަމެވެ. އަދި މިހާރު ކުރިމަތިވެފައިވާ މައްސަލަތައް، އިލެކްޝަންސް ކޮމިޝަނާއި، އިންތިޚާބުގައި ބައިވެރިވާ ސިޔާސީ ޕާޓީތަކާއި، ކަމާބެހޭ ހުރިހާ މުއައްސަސާތައް ގުޅިގެން ޙައްލުކޮށް، އޮމާންކަމާ އެކު މި އިންތިޚާބު ބޭއްވޭނެ ވެށްޓެއް ޤާއިމުކޮށް ދެއްވުމަށް ވެސް އަޅުގަނޑު އިލްތިމާސް ކުރަމެވެ. އަދި ކޮންމެ ރައްޔިތަކަށް ވެސް ލިބިފައިވާ ވޯޓުލުމުގެ ޙައްޤަށް އެއްވެސް އުނި ކަމެއް ނާންނާނެ ގޮތެއްގެ މަތިން ކަންކަން އިންތިޒާމުކޮށް ދެއްވުމަކީ ވެސް އަޅުގަނޑުގެ ވަރަށް ބޮޑު އެދުމެކެވެ." ބަޔާނުގައިވެ އެވެ. "މި ފުރުޞަތުގައި، އިންތިޚާބަށް ހުރަސް އެޅޭ ފަދަ އެއްވެސް ކަމެއް އެއްވެސް ފަރާތަކުން ނުހިންގެވުމަށާއި، އަމިއްލަ މަޞްލަޙަތަށް ވުރެ ޤައުމުގެ މަޞްލަޙަތު އިސް ކުރެއްވުމަށް ވެސް އަޅުގަނޑު އިލްތިމާސް ކުރަމެވެ."