އައްޑޫގެ ކުށުގެ މާހައުލު ފުޅާވެ ކޮންޓްރޯލުން ނެއްޓައިގެން ދަނީ ހޯމް މިނިސްޓަރާއި، ޕޮލިސް ކަމިޝްނަރު މުހައްމަދު ހަމީދުގެ ޒިއްމާ އަދާ ނުކުރެވިގެން ކަމަށް އެމްޑީޕީ ޓިކެޓުގައި އައްޑޫގެ މޭޔަރ ކަމަށް ވާދަ ކުރައްވާ އަލީ ނިޒާރު ވިދާޅުވެއްޖެއެވެ.
އައްޑޫގައި ސިލްސިލާ މާރާމާރީ އިތުރުވެ، ތޫނު އެއްޗެހި ބޭނުންކޮށް ފާއިތުވި ދެ ދުވަހު ވަނީ ހަތަރު މާރާމާރީ ހިންގާފައެވެ. މިކަމާއި ގުޅިގެން ނިޒާރު ވިދާޅުވީ އައްޑޫގެ ކުށުގެ މާހައުލު ފުޅާވެ ކޮންޓްރޯލުން ނެއްޓިގެންދާކަން ހޯމް މިނިސްޓަރ އިބްރާން އަދި ޕޮލިސް ކަމިޝްނާ މުހައްމަދު ހަމީދުއަށް އިހްސާސް ނުކުރެވޭކަމަށެވެ. އަދި އައްޑޫގެ 33،000 މީހުންގެ އާބާދީއަށް 20 ފުލުހުންނާއި ދެ ވެހިކަލް އޮވެގެން އަމާންކަން ގާއިމު ނުކުރެވޭނެކަމަށެވެ.
ނިޒާރު ވަނީ މިކަމަށް އަވަސް އެޅުމަށް ގޮވާލާފައެވެ.
ނިޒާރު މިގޮތަށް ވިދާޅުވި އިރު އައްޑޫ ސިޓީގައި ގާއިމްވެ ތިބޭ ފުލުހުންގެ އަދަަދު މަދުވުމާއި އެކު ފުލުހުންގެ އޮޕަރޭޝަންތައް ހިންގުމަށް އަބަދުވެސް މާލެއިން ފުލުހުންގެ ބެޗުތައް ދޭތެރެދޭތެރެއިން އައްޑޫއަށް ގެނެއެވެ.
ހިތަދޫ އާއި މަރަދޫގައި ރޭ ވެސް ވަނީ މާރާމާރީއެއް ހިންގާފައެވެ. އެގޮތުން މަރަދޫގައި ރޭ ހިންގި މާރާމާރީގައި ދެ ޒުވާނަކަށް ވަނީ ވަޅިން ހަމަލާދީފައެވެ.
މި ދެ މައްސަލަ ވެސް ފުލުހުން އަންނަނީ ތަހުގީގު ކުރަމުންނެވެ.
އައްޑޫގައި މިފަހަކަށް އައިސް މާރާމާރީތައް ހިނގުން ވަނީ އިތުރުވެފައެވެ. އެގޮތުން މިދިޔަ ހަފްތާގެ ތެރޭގައި ފޭދޫ އާއި ހިތަދޫގައި ވެސް މާރާމާރީތަކެއް ހިންގައި ޒުވާނުންތަކެއް ވަނީ ޒަހަމްކޮށްލާފައެވެ. ފޭދޫގައި ހިންގި މާރާމާރީއާ ގުޅިގެން ފުލުހުން ވަނީ ފަސް މީހަކު ހައްޔަރުކޮށްފައެވެ.