އައިޖީއެމްއެޗްގައި ބަނޑަށް ފަސް މަހުގައި ވިހެއި ކުއްޖަކަށް ފަރުވާ ނުދީ މަރުވަންދެން ބޭއްވިކަމަށް ބުނާ މައްސަލައެއް ބަލަމުން އަންނަ ކަމަށް އެ ހޮސްޕިޓަލުން ބުނެފިއެވެ.
އައިޖީއެމްއެޗްއިން ބުނީ މި މަހުގެ 13 ވަނަ ދުވަހުގެ ރޭ ވިހެއި ކުއްޖަކަށް ފަރުވާ ނުދީ މަރުވަންދެން ބޭއްވިކަމަށް އާއިލާއިން ތުހުމަތު ކުރާ މައްސަލައެއް ތަހްގީގު ކުރަމުން އަންނަ ކަމަށެވެ. އަދި އެ މައްސަލަ ނިމުމުން ތަފްސީލް ހާމަ ކުރާނެކަމަށެވެ.
ތުއްތު ކުއްޖާ މަރުވި މައްސަލާގައި އެކުއްޖާގެ އާއިލާއިން ވަނީ ސަރުކާރުގެ އެކި ފަރާތްތަކާއި މައުލޫމާތު ހިއްސާކޮށްފައެވެ. އެގޮތުން ނައިބް ރައީސްގެ ސެކްރެޓަރީ ނަޒްރާ ނަސީމަށް ފޯނުން ގުޅައި ކުއްޖާ ނާސިން ޓްރޭއެއްގެ މަތީ ފަރުވާ ނުދީ ބާއްވާފައިވާ މަންޒަރު ވަނީ ދައްކާފައެވެ.
އެހާދިސާ އާއި ގުޅޭ ގޮތުން އާއިލާއިން ބުނީ މަރުވި ކުއްޖާގެ މަންމަ ބަނޑަށް ތަދުވެގެން އައިޖީއެމްއެޗަށް ދިއުމުން އޮބްޒަވޭޝަނަށް އެތަނުގައި އެޑްމިޓު ކުރިކަމަށެވެ. އަދި ބަނޑުގައި ރިއްސަނީ ފައިބްރޮއިޑަކާ އެއްކޮށް ބަނޑުބޮޑުވުމުން ކަމަށް އައިޖީއެމްއެޗުން ބުނިކަމަށެވެ. އެގޮތަށް އޮބްޒަވެޝަނުގައި ބާއްވާފައިވަނިކޮށް ކުއްޖާ ވިހެއީ ހޮސްޕިޓަލްގެ ފާހާނާގެ ތެރެއަށް ނަރުހުންގެ އަތްމައްޗަށް ކަމަށް އާއިލާއިން ބުނެއެވެ.
އާއިލާއިން ބުނީ ކުއްޖާ އަކީ ދުވަސްނުފުރާ ވިހެއި ކުއްޖަކަށް ވުމުން ކުއްޖާ ދުނިޔޭގައި ހުރުމުގެ އުއްމީދު ކުޑަކަމަށް ޑޮކްޓަރުން ބުނިކަމަށެވެ. އަދި ކުއްޖާއަށް ފަރުވާ ނުދީ ފޮތިގަޑެއްގެ މަތީ ނާސިން ޓްރޭއެއްގެ މަތީ ބޭއްވި ކަމަށެވެ. އަދި އެކަމާއިގުޅިގެން އާއިލާއިން އެކި ފަަހރުމަތުން އެވާހަކަ ހޮސްޕިޓަލުގެ ވެރިންނާއި ދެއްކި ނަމަވެސް އެއްވެސް ކަމެއް ނުކުރާކަމަށް އާއިލާއިން ބުނެއެވެ.
ކުއްޖާގެ މަރު ފޯމުގައި ވާ ގޮތުން އެކުއްޖާ މަރުވެފައިވަނީ އޭގެ ހަ ގަޑި އިރު ފަހުން އެރޭ ފަތިހު 3:27 ގައެވެ.
އައިޖީއެމްއެޗްއިން ބުނީ މި މައްސަލަ ސީރިއަސް މައްސަލައެއްގެ ގޮތުގައި ބަލަމުން އަންނަ ކަމަށެވެ.