އައްޑޫ ސިޓީގެ މޭޔަރުކަމަށް ރައްޔިތުން އިންތިހާބު ކޮޮށްފި ނަމަ ސިޓީގެ ހުރިހާ އުމުރުފުރައެއްގެ އަންހެނުންނަށް ބޭނުންވާ "ޕެޑް" އައްޑޫ ކައުންސިލުން ހިލޭ ލިބޭނެ އިންތިޒާމު ހަމަޖައްސާނެކަމަށް ޕީޕީއެމް ޓިކެޓުގައި އައްޑޫގެ މޭޔަރު ކަމަށް ވާދަކުރައްވާ މުހައްމަދު ލަޠީފު ވިދާޅުވެއްޖެއެވެ.
ޒޫމް މެދުވެރިކޮށް ކެމްޕެއިން ކުރުމަށް ކޮންމެ ދުވަހަކު ހެނދުނު ކުރިއަށް ގެންދާ "ގުޑް މޯނިން އައްޑޫ ސިޓީ"ގެ މިއަދުގެ ޕްރޮގްރާމް ގައި އަންހެނުންނަށް އަމާޒުކޮށް ހިންގާނެކަންކަން ވަނީ ފާހަގަ ކުރައްވާފައެވެ. އެގޮތުން މޭޔަރު ކަމަށް އިންތިހާބު ވެއްޖެނަމަ :"ހުސްނުވާ ޕެޑް" އައްޑޫގެ އަންހެނުންނަށް ލިބޭނެ ގޮތް ކައުންސިލުން ހަދާނެކަމަށެވެ.
ލަޠީފު ވިދާޅުވީ އައްޑޫ ސިޓީގައި ޕެޑް ގަންނަން ދަތި އެކި އުމުރު ފުރާގެ މީހުން ތިބިކަމަށެވެ. އަދި މި ކަމުގެ ސަބަބުން ޕެޑް ގަތުމަށް ކުރާ ހަރަދު ސޭވްވެގެންދާނެކަމަށެވެ. އަދި މިއީ ދުނިޔޭގެ ބައެއް ގައުމުތަކުގައި ޕްރެކްޓިސް ކުރަމުން އަންނަ ކަމެއް ކަމަށް ލަޠީފު ވިދާޅުވިއެވެ.
ލަޠީފު ވިދާޅުވީ އައްޑޫ ސިޓީގެ އަންހެނުން ހާލަތު ދެނެގަތުމަށް ސާވޭއެއް ހެއްދުމަށް ނިންމަވާފައިވާ ކަމަށެވެ. އަދި މިސާވޭ ނިމުމުން އައްޑޫގެ އަންހެނުންގެ ތެރެއިން ކައިވެނިކޮށްގެން ތިބި މީހުންނާއި، އެކަނިވެރި މައިންނާއި، އިސް ރަށްވެހިން އަދި ދިގު މުއްދަތަށް ބޭސް ކުރަމުން އަންނަ މީހުންނަށް ހުރި ގޮންޖެހުން އެނގިގެންދާނެ ކަމަށެވެ.
ލަޠީފު ވަނީ މަސްވެރިންނާއި އެކު މަހަކު އެއް ފަހަރު މަހަށް ވަޑައިގަންނަވާނެކަމަށްވެސް ވައުދުވެފައެވެ.