އިޖުތިމާއީ މަސައްކަތްތަކަށް ހާއްސަކޮށްގެން ޝަންގްރިއްލާ ވިލިގިލި ރިސޯޓްގެ އެހީތެރިކަމާ އެކު މަރާމާތުކޮށް ތަރައްގީ ކުރި ސ. މީދޫ "ކާޑުގެ" ހުޅުވައިފި އެވެ.
"ކާޑުގެ" މެނޭޖް ކުރާ މީދޫ އެކުވެރިންގެ ޗޭނުން ބުނީ އެ ޕްރޮޖެކްޓަށް ބޮޑު ހަރަދެއް ހޭދަވި ކަމަށެވެ.
ކާޑުގެ މަރާމާތުކޮށްފައި ވަނީ އެ ތަނުގެ އަސްލު ނުގެއްލޭ ގޮތަށެވެ.
އެގޮތުން ދެ ބުރިއަށް އިމާރާތް ކޮށްފައިވާ ތަނުގައި އަޅާފައިވާ ޑެކް ބަދަލުކޮށް ފުރާޅު ވެސް ވަނީ ބަދަލުކޮށްފަ އެވެ. އަދި ރަށަށް ޒިޔާރަތް ކުރާ މެހްމާނުންނަށް ފާޙާނާ ކުރެވޭނެ ނިޒާމެެއް ގާއިމް ކުރުމަށް ދެ ފާހާނާ ވެސް ވަނީ ހަދައިފަ އެވެ. އަދި އެތަނުގައި ލައިބްރަރީއަކާއި ޗޭން ޖަމިއްޔާ އަށް އޮފީހެއް ވެސް ވަނީ ގާއިމު ކުރެވިފަ އެވެ.
ޝަންގްރިއްލާއިން ވަނީ މިދިޔަ އަހަރު ކާޑުގޭގައި ޕާކެއް ވެސް ތަރައްޤީކޮށް ދީފަ އެވެ.
ޝަންގްރިއްލާގައި މަސައްކަތް ކުރާ މީދޫ މުވައްޒަފުންނާއި މީދޫ ޒުވާނުން އަދި ޖަމިއްޔާތައް ގުޅިގެން ހެދި ޕާކަކީ ރަށުގައި ދިރިއުޅޭ އުމުރުން ދުވަސްވީ މީހުންނަށް އަމާޒުކޮށްގެން ހެދި ތަނެކެވެ.
އަދި އެތަނުގެ ބޭނުން އުމުރުން ދުވަސްވީ ބޭފުޅުން އަންނަނީ ހިފަމުންނެވެ.