ބޮލީވުޑްގެ ބަތަލާ އަދި ވިޔަފާރިވެރިޔާ ޝިލްޕާ ޝެޓީގެ އެޕާޓްމަންޓަށް ވަގުން ވަދެ، އަގު ބޮޑު ސާމާނުތަކެއް ވަގަށް ގެންގޮސްފި އެވެ.
މީޑިއާ ރިޕޯޓްތައް ބުނާ ގޮތުގައި ޝިލްޕާ އާއި ފިރިމީހާ ރާޖް ކުންދުރާ ޖުހޫގައި ދިރިއުޅޭ ކިނާރާ އެޕާޓްމަންޓުން ވައްކަންކޮށްފައި ވަނީ މިދިޔަ އަންގާރަ ދުވަހާއި ބުދަ ދުވަހުގެ ރެ އެވެ.
އެހެން ނަމަވެސް ވައްކަން ކުރި އިރު، ޝިލްޕާގެ ދެމަފިރިން ގެއަކު ނެތެވެ. މައްސަލަ ފުލުހުންނަށް ރިޕޯޓް ކުރީ ޝިލްޕާގެ މެނޭޖަރެވެ.
މި މައްސަލަ ފުުހުންނަށް ރިޕޯޓްކޮށްފައިވާ އިރު، އެޕާޓްމަންޓްގެ ގްރައުންޑް ފްލޯގައި ހަދާފައި ހުރި ޖިމްގައި ހުރި އަގު ބޮޑު މިއުޒިކް ސިސްޓަމަކާއ އައިޕޮޑްތަކެއް ވަނީ ވަގަށް ގެންގޮސްފަ އެވެ. ރިޕޯޓްތައް ބުނާ ގޮތުގައި ގެއްލުނު ތަކެތީގެ އަގު 1.10 ލައްކަ ރުޕީސް އަށް އަރަ އެވެ.
މިކަމާ ބެހޭ ގޮތުން ޖުހޫ ޕޮލިސް ސްޓޭޝަންގެ އޮފިޝަލަކު ވިދާޅުވީ މައްސަލަ ތަހުގީގު ކުރަމުން އަންނަ ކަމަށެވެ.
އޭނާ ވިދާޅުވީ މި މައްސަލާގައި މިހާތަނަށް އެެއްވެސް މީހަކު ހައްޔަރުކޮށް އަދި ވަގަށް ގެންދިޔަ އެއްވެސް އެއްޗެއް ހޯދައި ވެސް ނުވާ ކަމަށެވެ.
ފުލުހުން އަދި އަންނަނީ އެޕާޓްމަންޓުގެ ސީސީޓީވީ ފުޓެޖްތައް ވެސް ބަލަމުންނެވެ.
މިދިޔަ މަހުގެ ތެރޭގައި އެކްޓަރު އަބޭ ޑިއޯލްގެ ކާރު ވެސް އޭނާ ދިރިއުޅޭ އެޕާޓްމަންޓުގެ ކައިރީގައި ޕާކްކޮށްފައި އޮތްވައި ވަނީ ވަގަށް ގެންގޮސްފަ އެވެ.