މިއަދު ހެނދުނު އައްޑޫ ލިންކު ރޯޑުގެ ހަންކެޑެ ހިސާބުން އެކްސިޑެންޓުވި އަންހެން މީހާގެ ހާލު ސީރިއަސް ކަަމަށް އައްޑޫ އިކުއިޓޯރިއަލް ހޮސްޕިޓަލް (އޭއީއެޗް) އިން ބުނެފިއެވެ.
އެކްސިޑެންޓުގައި އަނިޔާވެ ފަރުވާދެމުންދަނީ ސ. ހިތަދޫ، ސަންރީފު، ފާޠިމަތު އަސްމާއަށެވެ. އަސްމާ އެކްސިޑެންޓުވެފައިވަނީ އޭނާގެ ދަރިފުޅު އައްޑޫ ހައި ސްކޫލަށް ގެންދިއުމަށްފަހު އެނބުރި އޭނާ ދިރިއުޅެމުން އަންނަ މަރަދޫފޭދޫއަށް ދަނިކޮށެވެ.
އޭއީއެޗްއިން ބުނީ އަސްމާއަށް ހޮސްޕިޓަލްގެ އިމަޖެންސީ ރޫމްގައި ފަރުވާދެމުން އަންނައިރު އޭނާގެ ހާލު ސީރިއަސްކަމަށެވެ. އެގޮތުން އޭނާގެ ބޮލަށް ސީރިއަސް އަނިޔާތަކެއް ލިބިފައިވާ އިރު އިންޓާނަލީ ބްލީޑުވަމުން އަންނަކަމަށެވެ. އަދި މޭކަށިގަނޑު ބިންދައިގެން ގޮސް ވާއަތު ކޮޑު ކަޑިގަނޑުވެސް ބިދިފައިވާ ކަމަށެވެ. އަދި މިހާރު އޭނާއަށް ފަރުވާ ދެމުންދަނީ ވެންޓިލޭޓަރގެ އެހީގައެވެ.
އަސްމާ އެކްސިޑެންޓުވީ ކިހިނެއްކަމެއް އަދި ސާފެއް ނުވެއެވެ. އައްޑޫލައިވްއަށް މައުލޫމާތު ދިން މީހާ ބުނީ އަސްމާ ފެނުނީ ލިންކު ރޯޑުގެ އަރިމަތީގައި ވެއްޓި ވަރަށް ބޮޑަށް ޒަހަމްވެފައިވަނިކޮށެވެ.
"އެއްޗެއްގައި ޖެހި އެކްސިޑެންޓުވެފައިވާ ކަމަށް ބެލެވެނީ، އެކަމަކު އެ ސަރަހައްދުގައި އިތުރު އެއްޗެއް ފެންނާކަށް ނެތް، ހީ ނުވޭ ކަހާލައިގެން ވެއްޓިހެން އަނިޔާވެފައިވަނީ" އައްޑޫލައިވްއަށް މައުލޫމާތު ދިން މީހާ ބުންޏެވެ.
މި މައްސަލަ ހިތަދޫ ޕޮލިސް ސްޓޭޝަނުން ތަހްގީގު ކުރަމުން އަންނަ އިރު އިތުރު ތަފްސީލެއް ހާމަކޮށްފައި ނުވެއެވެ.