އިންޑިއާގައި ދިރިއުޅޭ ޕާކިސްތާންގެ މަޝްހޫރު ލަވަ ކިއުންތެރިޔާ އަދުނާން ސާމީގެ ރިހޭ ފައިމައްޗަށް އަބަދު އޮންނަނީ ފޮއި ވެއްޓިފަ އެވެ.
އެއް މައްސަލައަކުން އަރައި ގަނެވޭ އިރު، އަނެއް މައްސަލަ އޮންނަނީ ކުރިމަތިވެފަ އެވެ.
ވިސާގެ މުއްދަތު ހަމަވެ، ވިސާ އާ ނުކޮށް އޭނާ އިންޑިއާގައި އުޅޭތީ އެ މައްސަލަ ހޫނުވެ، އެންމެ ފަހުން ތިން މަސް ދުވަހުގެ ވިސާ ލިބި، އެ މައްސަލަގަނޑުން އަރައި ގަނެވުނުތަނާ އަނެއް މައްސަލަ މިހާރު ވަނީ ކުރިމަތިވެފަ އެވެ.
މި ފަހަރުގެ އޭނާގެ މައްސަަލައަކީ ޓެކްސް ނުދެއްކުމުގެ މައްސަލަ އެެވެ. ރިޕޯޓްތައް ބުނާ ގޮތުން މިދިޔަ އަހަރުގެ ޖުލައި މަހުން ފެށިގެން އަދުދާން ސާވިސް ޓެކްްހެއް ނުދައްކަ އެވެ.
މި މައްސަލާގައި އޭނާ ވަނީ ހޫނު ފެނަށް ވެއްޓިފަ އެވެ. ސަބަބަކީ ސާވިސް ޓެކްސް އިދާރާ އިން އޭނާ ޓެކްސް ދެއްކުމަށް އިންޒާރުކޮށް، އެގޮތަށް އަމަލު ނުކުރާ ނަމަ ކޯޓަށް ދާން ވެސް ނިންމުމެވެ.
ސާވިސް ޓެކްސް އިދާރާގެ ޑެޕިއުޓީ ކޮމިޝަނަރު ސަމީރު ވަންކަޅެ ވިދާޅުވީ އިންޑިއާގައި އެކި ދުވަސްމަތިން 15 އަށް ވުރެ ގިނަ ޝޯތައް އަދުނާން ބާއްވައި ބޮޑެތި ފައިދާތަކެއް ހޯދާފައިވާ އިރު، އޭނާ ސާވިސް ޓެކްސް ނުދައްކާ ކަމަށެވެ.
އެކަން ކަށަަވަރުކޮށް ދެއްވަމުން ސަމީރު ވިދާޅުވީ މިދިޔަ އަހަރުގެ ޖުލައި މަހުން ފެށިގެން އަދުނާން ޓެކްސް ދައްކަމުން ނުދާ ކަމަށެވެ. އަދި އަންނަ ހޯމަ ދުވަހު ޓެކްސް އިދާރާ އަށް އަދުނާން ހާޒިރުވުމަށް ވެސް ވަނީ އަންގައިފަ އެވެ.
އެ މައްސަލާގައި ޓެކްސް އިދާރާ އިން ސުވާލް ކުރުމުން އަދުނާން ބުނެފައި ވަނީ ރިޒާވް ބޭންކް އޮފް އިންޑިއާ (އާރްބީއައި) އިން އޭނާގެ އެކައުންޓް ފްރީޒްކޮށްފައިވާ ކަމަށެވެ.
އެހެންވެ ފައިސާގެ މުއާމަލާތް ނުކުރެވޭތީ ޓެކްސް ނުދެއްކި އޮތީ ކަމަށް އަދުނާން ބުނެފައިވެ އެވެ.
އެހެން ނަމަވެސް މި ވާހަކަ ގަބޫލް ކުރަން ސާވިސް ޓެކްސް އިދާރާ އަށް ވަނީ ދަތިވެފަަ އެވެ.