މިއަދު ނުބޭއްވުނު ރިޔާސީ އިންތިހާބް އަންނަ ހޮނިހިރު ދުވަހު ބާއްވަވައި ދެއްވުމަށް ރައީސް ޑރ. މުޙަންމަދު ވަޙީދު އެދިވަޑައިގެންފި އެވެ.
ރައީސް މިކަމަށް މި އެދިވަޑައިގަތީ، ހަމަޖެހިފައިވާ ތާރީޚުގައި އިންތިޚާބު ނުބޭއްވި ލަސްވަމުންދާތީ އާއި، އެކަމާ އެ މަނިކުފާނު ވަރަށް ކަންބޮޑުވެވަޑައިގަންނަވާތީ ކަމަށް ރައީސްގެ އޮފީހުން ބުންޏެވެ.
ރައީސް އޮފީހުން ބުނީ އަދި ރައީސް ބޭނުންފުޅު ވަނީ ހުރިހާ ކެންޑިޑޭޓުން ވެސް ބައިވެރިވާ، މިނިވަން، ސުލްހަވެރި އިންތިޚާބެއް ބޭއްވުމަށް ކަމަށެވެ.
މި މަހުގެ 26 ވާ ހޮނިހިރު ދުވަހު ރިޔާސީ އިންތިޚާބު ބޭއްވެވުމަށްޓަކައި، އިލެކްޝަންސް ކޮމިޝަންގެ ފަރާތުން ހުރިހާ ކެންޑިޑޭޓުންނާ މަޝްވަރާ ކުރައްވައި، އިންތިޚާބު ބޭއްވޭނެ ގޮތެއް ހޯއްދަވައި ދެއްވުމަށް މި ފުރުޞަތުގައި، އެ ކޮމިޝަނަށް ރައީސް ގޮވާލައްވަ އެވެ.
އަދި އިންތިޚާބުގައި ވާދަ ކުރައްވާ ތިން ކެންޑިޑޭޓުންނާއި އެބޭފުޅުން ތަމްސީލު ކުރައްވާ ސިޔާސީ ޕާޓީތަކުން ވެސް، އިންތިޚާބާ ގުޅިގެން ޚިލާފު އުފެދިފައިވާ ކަންކަމަށް ޙައްލެއް ހޯއްދަވައި ދެއްވުމަށް ރައީސް އެދިވަޑައިގަންނަވަ އެވެ.