ސ. ހިތަދޫ ގެއެއްގެ ބިއްލޫރި ތަޅާލައި، އެ ގޭ ޒުވާނަކަށް ބަޔަކު ގަލުން ހަމަލާ ދިނުމަށް ފަހު ފިލައިފި އެވެ.
މިރޭ 10:00 ޖަހާ އެހާކަށްހާ އިރު ހިތަދޫ މޫލެކެޑެ ސަރަހައްދުގައި ހިނގި މި ހާދިސާގައި ކުޑަ ދޮރުގެ ބިއްލޫރިތައް ތަޅާލާފައި ވަނީ އޯކިޑް ގޭގަ އެވެ.
މިކަން ކޮށްފައި ވަނީ ގްރޫޕް ހަދާފައި ދިޔަ ބައެކެވެ. އެ މީހުން ވަނީ ބިއްލޫރިތައް ތަޅާލުމަށް ފަހު، މަގުމަތީގައި އެ ވަގުތު ހުރީ އެ ގޭ ނާއިމް މުހައްމަދު، 21، އަށް ވެސް ގަލުން ހަމަލާދީ ޒަހަމްކޮށްލައިފަ އެވެ.
މި ހާދިސާގައި އޭނާގެ ބޮލަށް އެކި ވަރުގެ ޒަހަމްތަކެއް ވަނީ ލިބިފަ އެވެ. އަދި އޭނާގެ ސަލާމަތަަށްޓަކައި ނާއިމް ވަނީ ފުލުހުންގެ ކޮންޓްރޯލްގެ ދަށަށް ގެންގޮސްފަ އެވެ.
ބަޔަކު ބިއްލޫރިތައް ތަޅާލި އޯކިޑް ވިލާއަކީ އަދާލަތު ޕާޓީގެ ހިތަދޫގެ އިސް އެކްޓިވިސްޓެއް ކަމަށްވާ ހަސަން މުހައްމަދު (ސިންޑީ) ގެ އެ އެވެ.
އެހެން ނަމަވެސް ބަޔަކު އެ ގެއަށް ގެއްލުން ދިނީ ކޮން ސަބަބަކާ ހުރެ ކަމެއް ނޭނގެ އެވެ.
ފުލުހުން އަންނަނީ މިހާރު މިކަން ކުރި ކަމަށް ބެލެވޭ މީހުން ހޯދަމުންނެވެ.