އެމްޑީޕީގެ ސަޕޯޓަރުންތަކެއް މިރޭ ސ. ފޭދު އާއި މަރަދޫފެދޫ ގުޅޭ ކޯޒުވޭ އިން ދަތުރު ކުރެވޭ ގޮތަށް އޮތް ދެ ފަރާތް ބަންދުކޮށް، އެ ސަރަހައްދުން ދަތުރު ނުކުރެވޭ ގޮތަށް ބަންދުކޮށްގެން ތިއްބައި ފުލުހުން ގޮސް އެތަން ރޫޅާލައިފި އެވެ.
އަދި މިކަމާ ގުޅިގެން ފުލުހުންގެ ވާޖިބަށް ހުރަސް އެޅި ބައެއް މީހުން ވެސް ވަނީ ހައްޔަރުކޮށްފަ އެވެ. ފުލުހުން ޝީލްޑާ އެކު އެ ސަރަހައްދަށް ދިއުމާ އެކު، އެމްޑީޕީގެ ސަޕޯޓަރުންތަކެެއް ވަނީ ފުލުހުންނާ ދިމާއަށް ގާ ވެސް އުކާފަ އެވެ.
ނަމަވެސް ބަންދުކޮށްގެން ތިބީ ބަސްތާތަކާއި ވެހިކަލްތައް ބަހައްޓައިގެން ކަމަށްވާތީ ފުލުހުން ވަނީ އެ ސަރަހައްދުން އެ ތަކެތި ނަގައި މަގުން ދަތުރު ކުރެވޭ ގޮތް ހަދާފަ އެވެ.
ފުލުހުންގެ ދެކުނު ޑިވިޝަންގެ ކޮމާންޑަރު ޗީފް އިންސްޕެކްޓަރު އޮފް ޕޮލިސް އަހުމަދު ޝިފާން ވިދާޅުވީ، ކޯޒުވޭ ސަރަހައްދަށް އެއްވެ، އެތަން ބަންދުކޮށްގެން ތިބި މީހުން ދުރަށް ޖެއްސީ އާންމު ދަތުރަށް ދަތިވާ ގޮތަށް އެ މީހުންގެ އަމަލުތައް ބެހެއްޓުމުން ކަމަށެވެ.
އަދި ފުލުހުންގެ ވާޖިބަށް ހުރަސް އެޅި ބަައެއް މީހުން ހައްޔަރު ކުރި ނަމަވެސް، ހައްޔަރު ކުރި މީހުންގެ އަދަދު ވިދާޅުވާން ދަތި ކަމަށް ޝިފާން ވިދާޅުވި އެވެ.