ޤާނޫން އަސާސީގައި ކަނޑައަޅާފައިވާ ގޮތަށް އިލެކްޝަންސް ކޮމިޝަނުން ބާއްވާ އިންތިޚާބުތަކުގައި ބައިވެރިވުން ކަމުން އިލެކްޝަންސް ކޮމިޝަނުން ނިންމަވާ ގޮތެއްގެ މަތީން ބާއްވާ ރިޔާސީ އިންތިޚާބުގައި އެމްޑީޕީން ބައިވެރި ވާނެ ކަމަށް މިއަދު ބޭއްވި އެ ޕާޓީގެ ނެޝެނަލް އެގްޒެކެޓިވް ކޮމިޓީ (އެންއީސީ) އިން ނިންމައިފި އެވެ.
އަދި މިވަގުތު އޮތް ސަރުކާރު އުފެދިގެން އައި ގޮތާއި މި ސަރުކާރުގެ އަމަލުތައް ހުންނަ ގޮތުން މި ރާއްޖޭގައި ޤާނޫން އަސާސީގައި ކަނޑައަޅަފައިވާ ގޮތަށް ބާއްވާ އިންސާފުވެރި އިންތިޚާބެއް ނުބޭއްވޭނެ ކަމަށް ޤަބޫލު ކުރާތީ، އެމްޑީޕީން ދެކެނީ މިހާރު ވެރިކަމުގައި ހުރި ޑރ. މުޙައްމަދު ވަޙީދު ހަސަން މަނިކު ވަގުތުން އިސްތިއުފާދީ، އަދި އޭގެ ފަހުން ޤާނޫން އަސާސީގައިވާ ގޮތުގެ މަތިން ވެރިކަމަގެ ކަންތައްތައް ހަމަޖެހެން ޖެހޭނެ ކަމަށް އެމްޑީޕީން ބުންޏެވެ.
މިހެން މި ކަންކަން ކުރުމުގަ އާއި ރާއްޖޭގެ ރައްޔިތުންނަށް މިނިވަން އިންސާފުވެރި އިންތިޚާބެއް ހޯދައި ދިނުމަށް ކުރެވެން ހުރި ހުރިހާ މަސައްކަތެއް ކުރުމަށް ވެސް މިއަދުގެ ބައްދަލުވުމުގައި ވަނީ ނިންމައިފަ އެވެ.