އެމްއެންޑީއެފް އެއަ ވިންގުގައި ބޭނުން ކުރަމުން ގެންދާ "ކުރަނގި" ހެލިކޮޕްޓަރު މަރާމާތަށް އިންޑިޔާ ކޯސްޓްގާޑް މަނަވަރެއް ކަމަށްވާ އައިސީޑީއެސް ސަންގްރަމް ގައި އެމްއެންޑީއެފް ސަދަން އޭރިއާ އިން އިންޑިޔާ އަށް އިއްޔެ ގެންގޮސްފި އެވެ.
ހެލިކޮޕްޓަރު މަރާމާތަށް އިންޑިޔާ އަށް ގެންގޮސްފައި މި ވަނީ ރޫޓިންކޮށް ކޮންމެ އަހަރަކު ވެސް ކުރަމުން ގެންދާ މަރާމާތުތައް ކުރުމަށެވެ.
ކުރަނގި ހެލިކޮޕްޓަރު މަރާމާތަށް އިންޑިޔާ އަށް މިހާރު ގެންގޮސްފައިވާ އިރު، އިންޑިޔާ ކޯސްޓްގާޑުން ވަނީ އެހެން ހެލިކޮޕްޓަރެއް އެއަ ވިންގުގެ އޮޕަރޭޝަންތަކުގައި ބޭނުން ކުރުމަށް ރާއްޖެ ގެނެސްފަ އެވެ.
އަދި މިހާރު މި ހެލިކޮޕްޓަރު ދަނީ އެމްއެންޑީއެފް އެއަ ވިންގުގެ އޮޕަރޭޝަންތަކުގައި ކުރަނގި ހެލިކޮޕްޓަރެކޭ އެއް ފަދައިން ބޭނުން ކުރެވެމުންނެވެ.
އެންމެ ފަހުން ކުރަނގި ހެލިކޮޕްޓަރު މަރާމާތަށް އިންޑިޔާ އަށް ގެންގޮސްފައި ވަނީ މިދިޔަ އަހަރު އެވެ.
އިންޑިޔާގެ ކޯސްޓްގާޑް ސަންގްރަމް އެމްއެންޑީއެފް ސަދަން އޭރިއާ އަށް ޒިޔާރަތް ކުރުމުން، ސަދަން އޭރިއާގެ އެކްޓިން ކޮމާންޑަރު ކާނަލް ވައިސް ވަހީދު އެ ޝިޕަށް ޒިޔާރަތް ކުރައްވާފައި ކަމަށް އެމްއެންޑީއެފް ސަދަން އޭރިއާ އިން ބުންޏެވެ.