ރާއްޖޭގެ ޤައުމީ ބަޠަލުންގެ ޒިކުރާ ދިރުވާ އާލާ ނުކުރެވޭ ނަމަ، ޤައުމެއްގެ ހައިސިއްޔަތުން އަޅުގަނޑުމެން ނިކަމެތިވެދިޔުން ދާދި އަވަސް ވާނެ ކަމަށާއި، ސިފައިންގެ ހައިސިއްޔަތުން، ސިފައިންގެ ސަފުތަކުގެ ބަދަހިކަމަށްވެސް ލޮޅުން އަރައިގެން ހިނގައި ދާނެ ކަމަށް ރައީސް، އަދި ސިފައިންގެ އެންމެ މަތީ ވެރިޔާ ޑރ. މުޙަންމަދު ވަޙީދު ވިދާޅުވެއްޖެ އެވެ.
ރައީސް މިހެން ވިދާޅުވީ، މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) ގެ 59 ވަނަ އަސާސީ ތަމްރީނު ކޯހުގެ ބައިވެރިން، ސިފައިންގެ ހުވާކުރުމަށްޓަކައި މިއަދު ހެނދުނު ބަންޑާރަކޮށީގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
ރައީސް ވިދާޅުވީ ދިވެހި ސިފައިންނަކީ ވަރަށް ފަޚުރުވެރި، ދިގު މާޒީއެއްގެ އަހުލުވެރި ބައެއް ކަމަށެވެ.
އެހެންކަމުން ސިފައިންގެ ޚިދުމަތަކީ ދީނާއި، ޤައުމާއި، ރައްޔިތުންގެ ޙައްޤުގައި ވެވޭ މަތިވެރި ޖިހާދެއްކަން ހުރިހާ ސިފައިން ވެސް އަބަދުމެ ދަންނަން ޖެހޭނެ އެވެ.
ދިވެހި މުޖުތަމަޢުގެ އިޖުތިމާޢީ ފޭރާން މިއަދު މިވަނީ ވަރަށް ބޮޑަށް ބަދަލުވެފައިކަން ފާހަގަ ކުރައްވަމުން، ފަރުދީ ގޮތުން ދިވެހި ރައްޔިތުން އަގުވަޒަން ކުރާ ކަންކަން މިވަނީ ބަދަލު ވާން ފަށާފައި ކަމުގައި ރައީސް ވިދާޅުވި އެވެ.
އަދި ޖަމާޢަތުގެ މަޞްލަޙަތަށް ވުރެ ފަރުދީ މަޞްލަޙަތަށް އިސްކަން ދެވެމުން ދިޔުމުގެ ނަތީޖާއެއްގެ ގޮތުން ޤައުމުގެ އިޖުތިމާޢީ، އިޤްތިޞާދީ، އަދި ސިޔާސީ ޙާލަތު މިވަނީ ވަރަށް ބޮޑަށް ބަދަލުވެފައިވާ ކަމަށް ވިދާޅުވެ، މީގެ ތެރޭގައި ގިނަ ހެޔޮ ބަދަލުތަކެއް ހުރިއިރު، ނޭދެވޭ ބަދަލުތައް ވެސް މަދު ނޫންކަން ރައީސް ވާހަކަފުޅުގައި ފާހަގަ ކުރެއްވި އެވެ.
އަލަށް ހުވާކުރި ސިފައިންނާ މުޚާޠަބު ކުރައްވައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ރާއްޖެއަކީ މިއަދު ވަރަށް ނާޒުކު ޙާލަތެއްގައި އޮތް، ޅަފަތުގެ ޑިމޮކްރެސީއެއް ކަމަށް ވިދާޅުވިއެވެ، އަދި މިފަދަ ޙާލަތްތަކުގައި އޮންނަ ޑިމޮކްރެސީތައް ޙިމާޔަތްކުރުމަށް ސިފައިން ކުރާ މަސައްކަތް ވާންޖެހޭނީ ވަރަށް ޙިކުމަތްތެރިކަމާއި، ކެތްތެރިކަމާއި، ސާބިތުކަންމަތީ ތިބެގެން ކުރާ މަސައްކަތަކަށްކަން ރައީސުލްޖުމްހޫރިއްޔާ ބަޔާންކުރެއްވިއެވެ. މިރޮނގުން ވާހަކަފުޅު ކުރިއަށް ގެންދަވަމުން، ތަފާތު ޚިޔާލާއި، ތަފާތު ފިކުރާއި، ތަފާތު ވިސްނުންތަކާއެކުވެސް، ހުރިހާ އެންމެންނަކީ، ޤައުމީ މަޞްލަޙަތަށް ޖާގަދޭ ބަޔަކަށްވުމަށް ރައީސުލްޖުމްހޫރިއްޔާގެ ވާހަކަފުޅުގައި އެދިވަޑައިގެންނެވިއެވެ. އަދި ކުރާ ކޮންމެ ކަމެއްގައިވެސް ޤައުމީ ލޯތްބާއި ޤައުމީ ރޫޙު އިސްކުރާ ބަޔަކަށްވުމަށްވެސް ރައީސުލްޖުމްހޫރިއްޔާ އެދިވަޑައިގެންނެވިއެވެ.