އަންނަ ނޮވެމްބަރު މަހުގެ 15 ގައި ރިލީޒް ކުރަން ހަމަޖެހިފައިވާ ސަންޖޭ ލީލާ ބަންސާލީގެ "ރާމް ލީލާ" ހިމެނޭ ޕްރިޔަންކާ ޗޯޕްޅާގެ އައިޓަމް ލަވަ، ވަރަށް ތަފާތު ވާނެ ކަމަށް އޭނާ ބުނެފި އެވެ.
މީގެ ކުރިން "ޝޫޓް އައުޓް އެޓް ވަޑާލާ" ގެ "ބަބްލީ ބަދްމާޝް" އައިޓަމް ލަވަ ކުޅެފައިވާ ކުޅަދާނަ ބަތަލާ ބުނީ "ރާމް ލީލާ" ގައި އޭނާ ފެނިގެން ދާނީ އައިޓަމް ލަވައަކީ މި ޒަމާނަށް ފެތޭ މުޖުރާ ލަވައެއް ކަަމަށެވެ. އަދި ލަވައިގެ ނެށުން ވެސް ވަރަށް ތަފާތު ވާނެ ކަމަށް ޕްރިޔަންކާ ބުންޏެވެ.
"މި ލަވަ އަހަންނަށް ލިބުމުން ވަރަށް އުފާވި. ސަބަބަކީ ބަންސާލީއަކީ އަބަދުވެސް އަހަރެންގެ ވަރަށް ބޮޑު ފޭނެއް. އޭނާގެ ފިލްމުގައި އަހަރެން ކުޅޭ އައިޓަމް ލަވަ ވަރަށް ތަފާތު ވާނެ. އެއީ އިންޑިއަން މިއުޒިކަށް ހަދާފައިވާ އެކަމަކު ވެސްޓަން ޓަޗް ވެސް ހިމެނޭ ގޮތަށް ތައްޔާރުކޮށްފައިވާ ހިތްގައިމު ލަވައެއް،" ޕްރިޔަންކާ ބުންޏެވެ. "އަސްލު ލަވަ އަށް ރިހާސަލް ކުރާކަށް ވެސް މާ ގިނަ ވަގުތެއް ނުލިބުނު އަހަރެންގެ ޝެޑިއުލް ހުރި ގޮތުން. އެގޮތުން ރޭގަނޑު ލިބުނު ވަގުތުކޮޅެެެއްގެ ތެރޭގައި ރިހާސަލް ބާއްވައި ލަވަ ޝޫޓްކޮށްފައި ވާނީ."
މި ލަވަ ޕްރިޔަންކާ އަށް ހުށަހެޅުމުގެ ކުރިން ބަންސާލީގެ "ހަމް ދިލް ދޭ ޗުކޭ ސަނަމް" އާއި "ދޭވްދާސް" ގެ ބަތަކާ އައިޝްވާރިއާ ރާއީ ބައްޗަން އަށް ވެސް ހުށަހެޅި އެވެ. އެކަމަކު ސްކްރީނާ މިވަގުތު ދުރުގައި ހުރި އޭޝް އަށް މި އޮފާއިގެން ކުރިއަށް ދެވޭ ގޮތް ނުވީ އެވެ.
"ރާމް ލީލާ" ގެ ތަރިންނަކީ ދީޕިކާ ޕަދްކޯން އާއި ރަންވީރު ސިންގެވެ.