މިދިޔަ ހޮނިހިރު ދުވަހުގެ ރޭ ސ. ފޭދު އާއި މަރަދޫފޭދޫ ކޯޒްވޭ ބަންދުކޮށްގެން އެމްޑީޕީގެ ސަޕޯޓަރުންތަކެއް ހުރި އިހުތިޖާޖުގައި ފުލުހުންނާ ކުރިމަތިލައިގެން ހައްޔަރު ކުރި މީހުންނަށް ފުލުހުން އަނިޔާކޮށްފައިވާ ކަމަށް އެމްޑީޕީ އައްޑޫ ދާއިރާ އިން ބުނެފި އެވެ.
އެމްޑީޕީ އައްޑޫ ރައީސް އަހުމަދު އަދުހަމް ވެސް ވަނީ އޭނާގެ ޓްވިޓާގައި ފުލުހުން އަނިޔާ ކުރި ކަމަށް ބުނާ މީހެއްގެ ބުރަކަށީގައި ހުރި ޒަހަމްތަކެއްގެ ފޮޓޯއެއް އާންމުކޮށްފަ އެވެ.
ފޭދޫ ސިއްހީ މަރުކަޒުގެ އޮފިޝަލަކު ވެސް މިއަދު ވިދާޅުވީ ފުލުހުން އަނިޔާ ކުރި ކަމަށް ބުނާ މީހަކު ސިއްހީ މަރުކަޒުން ފަރުވާ ވެސް ހޯދާފައިވާ ކަމަށެވެ.
އެހެން ނަމަވެސް ފުލުހުން ބުނީ އެއްވެސް މީހަކަށް އަނިޔާކޮށްފައި ނުވާނެ ކަމަށެވެ. އަދި އަނިޔާ ކުރި ކަމަށް ބުނެ ދައްކަނީ ހަގީގަތާ ހިލާފު ވާހަކައެއް ކަމަށް ވެސް ފުލުހުން ބުންޏެވެ.
އިހުތިޖާޖް ކުރި ރޭ ފުލުހުންނާ ދިމާއަށް ގަލާއި ފުޅި ފަދަ ތަކެތި އުކައި ފުލުހުންގެ ވާޖިބަށް ހުރަސް އެޅި ހަތަރި މީހަކު ފުލުހުން ހައްޔަރުކޮށް، އެ މީހުންގެ ބަންދާ މެދު ގޮތެއް ނިންމަން އިއްޔެ ކޯޓަށް ވެސް ގެންދިޔަ ކަމަށް އެނގިފައިވެ އެވެ.
އެ ރޭ ފުލުހުން ހަ މީހަކު ހައްޔަރު ކުރި ނަމަވެސް، ފަހުން ދެ މީހަކު ވަނީ ދޫކޮށްލާފަ އެވެ.