ރާއްޖޭގެ 58 ރަށެއްގައި ކޮވިޑް-19ގެ އެކްޓިވް ކޭސްތައް ތިބިކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ހާމަކޮށްފިއެވެ.
އެޗްޕީއޭއިން ބުނެފައިވަނީ އިއްޔަގެ ނިޔަލަށް 58 ރަށެއްގައި މިވަގުތު ޖުމުލަ 887 ކޮވިޑް ޕޮޒިޓިވް އެކްޓިވް ކޭސްތިބި ކަމަށެވެ. މީގެ ތެރޭގައި ހިމެނެނީ 633 ދިވެހިންނާއި 254 ބިދޭސީންނެވެ.
މިވަގުތު ރާއްޖޭގެ 17 ރަށެއްވެސް ވަނީ ކޮވިޑް-19 ގެ ސަބަބުން މޮނިޓަރިންގެ ހާލަތުގައެވެ. އެއީ ދ. ކުޑަހުވަދޫ، ރ. އުނގޫފާރު، ދ. މީދޫ، ކ. ހުރާ، ކ. ދިއްފުށި، ޅ. ނައިފަރު، ރ. މަޑުއްވަރި، ރ. ހުޅުދުއްފާރު، ޅ. ފެލިވަރު، ޅ. ހިންނަވަރު، ރ. އަލިފުށި، ގދ. ތިނަދޫ، ޅ. އޮޅުވެލިފުށި، ނ. ހޮޅުދޫ، ރ. މާކުރަތު، ޅ. ކުރެންދޫ، އަދި ށ. މަރޮށި އެވެ.
މިފަހަކަސް އައިސް މާލެއިން ކޮވިޑް-19 ގެ ކޭސްތައް ފެންނަ ވަރަށް ވުރެއް ރާއްޖޭގެ އެހެން ރަށްރަށުން ކޭސްތައް ފެންނަމިންވަރު އަންނަނީ އިތުރުވަމުންނެވެ. މާލެ ނޫން އެހެން ރަށްރަށުގައި ކޮވިޑް-19 ގެ ގިނަ ކޭސްތަކެއް ފެންނަމުން އަންނައިރު ގިނަ ބަޔަކު ބުނަމުން އަންނަނީ އެގޮތަށް ރަށްތަކަށް ބަލި ފެތުރެނީ އެޗްޕީއޭގެ ހާއްސަ ހުއްދައިގެ ދަށުން ރަށްރަށަށް އެކި މީހުންނަށް ދަތުރުކުރުމުގެ ފުރުސަތު ދޭތީ ކަމަށެވެ.