ބާތިލް ކުރި ރިޔާސީ އިންތިހާބުގައި "ގައުމައިގެން ކުރިއަށް" ކޯލިޝަންގެ ކެމްޕޭނުގައި އިސް ދައުރެއް އަދާ ކުރެއްވި އިކޮނޮމިކް މިނިސްޓްރީގެ ޑެޕިއުޓީ މިނިސްޓަރު ޝިހާމް މުހައްމަދު ވަހީދު އެ މަގާމުން މިއަދު އިސްތިއުފާ ދެއްވައިފި އެވެ.
ޝިހާމް ވިދާޅުވީ އޭނާ އިސްތިއުފާ ދެއްވީ ސަރުކާރުގެ ކޯލިޝަނުން ވަކިވާން ޑީއާރުޕީގެ ކައުންސިލް އަޣުލަބިއްޔަތުން ނިންމާފައިވާ ނިންމުމަށް އިހްތިރާމް ކުރުމުގެ ގޮތުން ކަމަށެވެ.
އޭނާ ވިދާޅުވީ އިސްތިއުފާގެ ސިޓީ މިއަދު ރައީސްއަށް ފޮނުއްވާފައި ވާނެ ކަމަށެވެ.
ޝިޔާމް ވިދާޅުވީ މަގާމުން އިސްތިއުފާ ދެއްވި ނަމަވެސް ރައީސް ޑރ. ވަހީދާއި، އެކޮނޮމިކް މިނިސްޓަރު އަހުމަދު މުހައްމަދާއި ދޭތެރޭ ޒާތީ އެއްވެސް މައްސަލައެއް ނެތް ކަމަށާއި، އިސްތިއުފާ ދެއްވީ ހަމައެކަނި ޕާޓީގެ ނިންމުމަށް އިހްތިރާމް ކުރާތީ ކަމަށެވެ.
ސަރުކާރުން ވަކިވުމަށް ޑީއާރުޕީން ނިންމުމާއި ގުޅިގެން ޑީއާރުޕީ އަށް ނިސްބަތްވާ މޯލްޑިވްސް ޕޯސްޓް ލިމިޓެޑްގެ ޗެއާމަން އަހްމަދު ނިޒާމް (ކެލާ ނިޒާމް) އާއި، ފޮރިން މިނިސްޓްރީގެ ސްޓޭޓް މިނިސްޓަރު ހަސަން ސައީދުވެސް އިއްޔެ ވަނީ މަގާމުން އިސްތިއުފާ ދެއްވައިފަ އެވެ.
ނަމަވެސް ޑީއާރުޕީ އަށް ނިސްބަތްވާ ދެ ވަޒީރުންގެ ގޮތުގައި ތިއްބެވި އެޑިޔުކޭޝަން މިނިސްޓަރު ޑރ. އާސިމް އަހްމަދާއި، ފިޝަރީޒް މިނިސްޓަރު އަދި ހޯމް މިނިސްޓްރީ ވަގުތީ ގޮތުން ހިންގެވުމާ ހަވާލުވެ ހުންނެވި އަހްމަދު ޝަފީއު އަދި މަގާމުން އިސްތިއުފާ ދެއްވާފައެއް ނުވެ އެވެ.