ސ. ހިތަދޫގައި މިރޭ ޒުވާނަކަށް ތޫނު އެއްޗަކުން ހަމަލާދި ޒަހަމްކޮށްލައިފިއެވެ.
އައްޑޫ އިކުއިޓޯރިއަލް ހޮސްޕިޓަލް (އޭއީއެޗް) އިން ބުނީ ތޫނު އެއްޗަކުން ހަމަލާދީ ޒަހަމްކޮށްފައިވާ ޒުވާނަކަށް ހޮސްޕިޓަލުގައި ފަރުވާ ދެމުން އަންނަ ކަމަށެވެ. އަދި އޭނާގެ ހާލު ސީރިއަސް ނޫންކަމަށް ހޮސްޕިޓަލުން މައުލޫމާތުދެއެވެ.
ހިތަދޫގެ މާރާމާރީ އާއި ގުޅޭގޮތުން ފުލުހުން ވަކި ތަފްސީލެއް ހާމަނުކުރެއެވެ. ފުލުހުންގެ މީޑިއާ އޮފިޝަލް ވިދާޅުވީ މިރޭ 21:16 ގައި ތޫނު އެއްޗަކުން ހަމަލާދީ ޒުވާނަކު ޒަހަމްކޮށްލި މައްސަލައެއް ހުށަހެޅިފައިވާ ކަމަށެވެ. އަދި މައްސަލަ ބަލަމުން އަންނަ އިރު މި ހާދިސާ އާއި ގުޅިގެން މީހަކު ހައްޔަރުކޮށްފައި ނުވާކަމަށެވެ.
އައްޑޫގައި މިދިޔަ މަހުވެސް ވަނީ ތަފާތު ހަތަރު މާރާމާރީ ހިންގައި 5 މީހަކު ޒަހަމްކޮށްލާފައެވެ.
މަދު ފުލުހުން ތަކެއް ހަރަކާތްތެރިވާ އައްޑޫގައި ދޭތެރެ ދޭތެރެއިން މާރާމާރީ ހިންގައި މީހުންގެ ޖިސްމަށް ބޮޑެތި އަނިޔާތަކެއް ދީފައިވެއެވެ.