އަތޮޅުތެރޭގެ 65 ރަށެއްގައި ކޮވިޑް-19 ގެ 900 އަށް ވުރެ ގިނަ އެކްޓިވް ކޭސް އުޅޭ ކަމަށް ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ) އިން ބުނެފިއެވެ.
ރޭ ބޭއްވި ނޫސްވެރިންގެ ބައްދަލުވުމުގައި އެޗްއީއޯސީގެ ތަރުޖަމާނު ޑރ.ނަޒްލާ ރަފީގު ވިދާޅުވީ އަތޮޅުތެރޭގެ 65 ރަށެއްގައި ކޮވިޑްގެ 925 ކޭސް އުޅޭ ކަމަށާއި މި އަދަދަކީ އަތޮޅުތެރެއިން މިހާތަނަށް އެކްޓިވް ކޭސް ނުފެންނަހާ ގިނަ އަދަދެއް ކަމަށެވެ.
އަދި މި ދުވަސްވަރަކީ އެހެން ދުވަސްވަރުތަކާ ހިލާފަށް މޮނީޓަރިންގެ ހުރި ރަށްތަކުގެ އަދަދުތައް ވެސް ގިނަ ދުވަސްވަރެއް ކަމަށްވެސް ނަޒްލާ ވިދާޅުވިއެވެ. އެގޮތުން މިވަގުތު މޮނީޓަރިންގެ ހާލަތުގައި ރާއްޖޭގެ 17 ރަށެއް އެބައޮތެވެ.
އެއީ ދ. ކުޑަހުވަދޫ، ދ. މީދޫ، ކ. ހުރާ، ކ. ދިއްފުށި، ޅ. ނައިފަރު، ރ. ރ. ހުޅުދުއްފާރު، ޅ. ފެލިވަރު، ޅ. ހިންނަވަރު، ރ. އަލިފުށި، ޅ. އޮޅުވެލިފުށި، ރ.މާކުރަތު، ޅ.ކުރެންދޫ، ށ.މަރޮށި، އދ.މާމިނގިލި، އދ.މަހިބަދޫ އަދި ވ.ތިނަދޫ އެވެ.
އިއްޔެ ރާއްޖެއިން ކޮވިޑް-19 އަށް 132 މީހުން ޕޮޒިޓިވް ވެފައިވާއިރު އޭގެތެރެއިން 65 ކޭސް ފެނިފައިވަނީ މާލެ އިން އަދި 45 ކޭސް އަތޮޅުތެރެއިން، 19 ކޭސް ރިސޯޓުތަކުން އަދި އެއް ކޭސް އިންޑަސްޓްރިއަލް ސައިޓުތަކުން ފެނިފައިވެއެވެ. ރާއްޖޭގައި މިވަގުތު ކޮވިޑް އެކްޓިވް ކޭސްތަކުގެ ގޮތުގައި ތިބީ 3061 މީހުންނެވެ.