ސަލާމަތީ ހާއްސަ ސިފަތަކެއް އިތުރުކޮށް، 100ރ. ގެ އާ ނޫޓުތަކެއް މިއަދު ނެރެފައިވާ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނެފި އެވެ.
މަރުކަޒީ ބޭންކް އެމްއެމްއީ އިން ބުނީ އަލުން ޗާޕު ކުރަން ޖެހޭ ވަރަށް ސްޓޮކް ދަށްވުމުން، ސެޕްޓެމްބަރު ،23 2013 ގައި ރާއްޖެ ގެނެސް، ދިވެހި ދައުލަތުގެ ހަޒާނާގައި ރައްކާކޮށްފައިވާ 100ރ. ގެ ބޭންކް ނޫޓް، ދައުރުވާ ފައިސާގެ ތެރެއަށް ނެރެފައިވާ ކަމަށެވެ.
ސަލާމަތީ ހާއްސަ ސިފަތަކެއް އިތުރުކޮށް 100ރ. ގެ އާ ނޫޓުގައި ކަރުދާހުގެ ތެރެއިން ގަތާފައިވާ ތިން މިލިމީޓަރުގެ ފުޅާ މިނުގެ ރޮދި ފަށަކާއި، ނޫޓަށް އަލި އެޅޭ ގޮތުންނާއި ބަލައި ދިމާލަކުން ސަލާމަތީ ރޮދި ފަށުގެ ކުލަ ފެހި ކުލައަކަށް ބަލަދުވާނެ ކަމަށް އެމްއެމްއޭ އިން ބުންޏެވެ.
އަދި ނޫޓު އައްޔަށް ދިއްކުރުމުން ސަލާމަތީ ރޮދިފަށް މެދުނުކެނޑި ފެންނަން ހުންނާނެ ކަމަށާއި، އެ ރޮދި ފަށުގައި "100 އެމްއެމްއޭ" ފެންނަން ހުންނާނެ ކަމަށް ވެސް އެމްްއެމްއޭ އިން ބުންޏެވެ.
އަދި އާ ނޫޓުގެ ފެން މަރުކާ ހިސާބު އަކުރުން "100" ފެންނަ ފެން މަރުކާއަކާއި ދައުލަތުގެ ނިޝާންގެ ފެން މަރުކާއެއް ހިމަނާފައި ވާނެ ކަމަށާއި ނޫޓު އައްޔަށް ދިއްކުރުމުން އެ އަދަދު ފެންނަން ހުންނާނީ ދައުލަތުގެ ނިޝާންގެ ފެންމަރުކާގެ މަތިން ކަމަށެވެ.
މީގެ އިތުރުން ނޫޓުގެ ކޮންމެ ކަނެއްގައި ކަތި ރޮނގުތަކެއްގެ ފެން މަރުކާ ވެސް ހުންނާނެ އެވެ. އަދި އެ ނޫޓުގައި ސޮއިކުރައްވާފައި ވާނީ އެމްއެމްއޭގެ ގަވަރުނަރު ޑރ. ފަޒީލް ނަޖީބެވެ.
ސޮއިކުރައްވާފައިވާ ތާރީހަކީ ޖެނުއަރީ 2، 2013 ކަމަށް ވެސް އެމްއެމްއޭ އިން ބުނެ އެވެ.