"މެރިޓައިމް ލޭބަ ކޮންވެންޝަން 2006" ގައި ދިވެހި ރާއްޖެއިން ބައިވެރިވުމަށް ވަޒީރުންގެ މަޖިލީހުން ރައީސަށް ލަފާ އަރުއްވައިފި އެވެ.
މި ގޮތަށް ލަފާ އެރުއްވީ، އިއްޔެ ބޭއްވެވި އެ މަޖިލީހުގެ ޖަލްސާގައި، މި މުޢާހަދާގައި ބައިވެރިވުމާ ގުޅޭ ގޮތުން މިނިސްޓްރީ އޮފް ޓްރާންސްޕޯޓް އެންޑް ކޮމިއުނިކޭޝަނުން ހުށަހެޅުއްވި ކަރުދާހެއްގެ މައްޗަށް މެންބަރުން މަޝްވަރާ ކުރެއްވުމަށް ފަހު އެވެ.
ޖަލްސާގައި މެންބަރުން ދެއްކެވި ވާހަކަފުޅުގައި، މި ކޮންވެންޝަންގައި ރާއްޖެ ބައިވެރިވުމަކީ، ބޭރު ޤައުމުތަކުގެ ބަނދަރުތަކަށް ދިވެހި ރާއްޖެއިން ގޮސް އައިސްވާ އުޅަނދުތަކަށާއި، ދިވެހި ރާއްޖެ ނޫން އެހެން ޤައުމުތަކުގެ ބޯޓުފަހަރުގައި މަސައްކަތްނކުރާ ދިވެހިންނަށް، މި ކޮންވެންޝަންގެ ދަށުން ލިބިދޭ ޙައްޤުތައް ލިބިދިނުމުގެ މަގު ފަހިވެގެން ދާނެކަން ފާހަގަ ކުރެއްވި އެވެ.
ރާއްޖެ ވަނީ އިންޓަނެޝަނަލް ލޭބަ އޮގަނައިޒޭޝަން (އައިއެލްއޯ) ގެ 183 ވަނަ މެންބަރު ޤައުމެއްގެ ގޮތުގައި މެއި 15، 2009 ގައި ހިމެނިފަ އެވެ.
"މެރިޓައިމް ލޭބަ ކޮންވެންޝަން 2006" ގައި ރާއްޖެ އިން ބައިވެރިވުމަށް، ވަޒީރުންގެ މަޖިލީހުން ނިންމެވުމާ ގުޅިގެން، ރައްޔިތުންގެ މަޖިލީހުގެ ލަފާ ހޯއްދެވުމަށް، އެމަޖިލީހަށް މިކަން ރައީސް ވަރަށް އަވަހަށް ހުށަހަޅުއްވާނެ އެވެ.