ދިވެހި ޒުވާނުންގެ މެދުގައި މަޝްހޫރުކަން ހޯދާފައިވާ މިޔުޒިކް ގްރޫޕެއް ކަމަށްވާ ސައުތް ކޮރެއާގެ ބީ.ޓީ.އެސް އަންނަ މެއި މަހުގައި އާ ލަވައެއް ރިލީޒް ކުރުމަށް ތައްޔާރު ވަމުންދާ ކަމަށް އެ ގްރޫޕުން ބުނެފިއެވެ.
ދާދި ފަހުން ބީ.ޓީ.އެސް ގްރޫޕުން ވަނީ އެމީހުން ތަފާތު އެކި ލަވަތަކުގެ މަސައްކަތް ކުރަމުންދާ ކަމަށާއި އަދި ގްރޫޕް ލަވައިގެ އިތުރުން ގްރޫޕްގެ އެކި ފަންނާނުންގެ ވަކިވަކި ހުށަހެޅުންތައް ފެނިގެންދާ ލަވަތައް ވެސް ގެނެސްދިނުމަށް ތައްޔާރުވަމުންދާ ކަމަށް ބުނެފައެވެ.
ބީ.ޓީ.އެސް ވަނީ އެންމެ ގިނަ ހަފްތާތަކުގައި ބިލްބޯޑްގެ ޑިޖިޓަލް ސޯންގް ސޭލްސް ޗާޓްގެ އެއްވަނަ މަޤާމް ހޯދާ ރެކޯޑް ހަދާފައެވެ. ގިނަ ރެކޯޑްތަކެއް މުގުރާލާ ކާމިޔާބު އަހަރަކަށް 2020 ހެދުމަށްފަހު މި ގްރޫޕުން ވަނީ އެމީހުންގެ ޖަޕަނީސް އަލްބަމް" ބީ.ޓީ.އެސް ދަ ބެސްޓް" ގެ ލަވަ "ފިލްމް އައުޓް" އާންމުންނާއި ހަމަޔަށް ގެނެސްދީފައެވެ. މި އަލްބަލް ނެރުމަށް ހަމަޖެހިފައިވަނީ ގްރޫޕްގެ 8ވަނަ އަހަރީ ދުވަހަށްފަހު 3 ދުވަސް ފަހުން 16 ޖޫން ގައެވެ.
ޖޫން 16ގައި އަލްބަމް ނެރޭއިރު، އެއާއިއެކު ކެމެރާގެ ފުރަގަހުގެ ބައެއް މަންޒަރުތަކާއި، ޖެކެޓް އުފައްދާ ފޮޓޯތަކާއި އަދި މީގެ އިތުރުން 23 ޓްރެކް ވެސް އާންމުންނާއި ހަމަޔަށް ގެނެސްދެވޭނެ ކަމަށް ރިޕޯޓްތައް ބުނެއެވެ.