ކަލާސް ޗެނަލްއިން ދައްކާ މަޝްހޫރު ރިއަލިޓީ ޝޯވ "ބިގްބޮސް" އިން މަޝްހޫރުކަން ހޯދާފައިވާ ޕާރަސް ޗާބްރާ އަދި ރުބީނާ ޑިލެއިކްގެ ވީޑިއޯ ލަވަ "ގަލަތު" އަށް އެ ދެތަރިންގެ ސަޕޯޓަރުންގެ ނަޒަރު ހުއްޓިއްޖެއެވެ.
ގިނަ ބަޔަކަށް ކަމުގޮސްފައިވާ މި ލަވައިގައި ދައްކުވައިދެނީ ރުބީނާ އަދި ޕާރަސް ދެމަފިރިންގެ ގޮތުގައެވެ. ފިރިމީހާ ބޭވަފާތެރިވެ އަނބިމީހާ އޭނާ ދެކެވާ ލޯބީގެ ނާޖާއިޒް ފައިދާ ނަގަމުންދާ މަންޒަރު ވަރަށް ފުރިހަމައަށް މި ލަވައިގާ ދައްކުވައިދެއެވެ. އެކަމުގެ ސަބަބުން ރުބީނާ އުޅެން ޖެހިފައިވާ ހިތްދަތި ދިރިއުޅުން ފެނިގެންދާ މި ލަވަ ކިޔާފައިވަނީ ހިތްގައިމު އަޑުގެ ވެރިޔާ އަސީސް ކޯރްއެވެ.
ރުބީނާ އަކީ "ބިގްބޮސް" އިން ފެނުމުގެ ކުރިން ވެސް ކަލާސް ޗެނަލުން ދައްކަމުން އަންނަ މަޝްހޫރު ޑްރާމާ ސިލްސިލާ "ޝަކްތީ: އަސްތިތުވާކާ އެހެސާސް" އިން ގިނަ ބައެއްގެ މަޤްބޫލްކަން ހޯދާފައިވާ ތަރިއެކެވެ. މި ޑްރާމާއިން ދުވަސްކޮޅަކަށް ނުފެނި ހުރުމަށްފަހު ވޭތުވެދިޔަ ހަފްތާގައި ރުބީނާ(ޑްރާމާގެ ނަން: ސޯމްޔާ) ވަނީ ޑްރާމާއަށް އެނބުރި އައިސްފައެވެ. "ބިގްބޮސް" އިން ފެނުމުގެ އިތުރަށް ރުބީނާއަކީ "ބިގްބޮސް 14" ކާމިޔާބުކުރި ފަރާތް ވެސް މެއެވެ.
"ގަލަތު" ލަވަ ކޮމްޕޯސް ކޮށްފައިވަނީ ވިކާސްއެވެ. އަދި ލިރިކްސް ލިޔެފައިވަނީ ރާޖް ފަތެހްޕޫރްއެވެ. މި ލަވައިގެ ވީޑިއޯ ޑައިރެކްޓް ކޮށްފައިވަނީ ޓްރޫ މޭކާސްއިންނެވެ.