ބޮލީވުޑަށް މަޝްހޫރު އަދި ކޮވިޑް ޕެންޑަމިކްގެ ތެރޭގައި އެންމެ ގިނައިން އެ ތަރިއަކަށް މީހުންގެ ސަމާލުކަން ހުއްޓުނު ސޯނޫ ސޫދު ދުނިޔޭގެ ސިއްޙަތު ދުވަހާއި ގުޅިގެން ނިކުތީ ކޮވިޑް 19 އިން ސަލާމަތްވުމަށް ޖަހާ ވެކްސިންގެ މުހިއްމުކަން މީހުންނަށް ބުނެދީ މީހުން ހޭލުންތެރި ކުރުވުމަށެވެ.
2020 ވަނަ އަހަރު ކޮވިޑް 19ގެ ޕެންޑަމިކްގެ ތެރޭގައި ސޯނޫ ފެނިގެން ދިޔައީ އެއް އަވަށުން އަނެއް އަވަށަށް ނުދެވިފައި ތިބި މަސައްކަތްތެރިންނާއި އެމީހުންގެ އާއިލާ އިންޑިއާގެ އެކި ހިސާބުތަކަށް އޭނާގެ އަމިއްލަ ޚަރަދުގައި ފޮނުވަމުންދިޔަ މަންޒަރެވެ. ފުޅާ ދާއިރާއެއްގައި އޭނާ ކުރި އެ މަސައްކަތުގެ ސަބަބުން މުޅި އިންޑިއާ ފަޚުރުވެރިވާފަދަ ދަރިއެއްގެ ލަޤަބު އޭނާއަށް ލިބިގެން ދިޔައެވެ.
އެތައް ބައެއްގެ ހެޔޮދުޢާ ސޯނޫއަށް ލިބެމުންދާ އިރު އޭނާގެ ހިތުގައި މި ޕެންޑަމިކްގެ ސަބަބުން ޙާލުގައި ޖެހުނު ފަރާތްތަކަށް އެހީތެރިވެވުމުގެ ސަބަބުން އާދަޔާއި ޚިލާފު ހަމްދަރުދީއެއް އުފެދުނު ކަމަށާއި އަދި މިހާރު މީހުންނަށް އެހީވުމަކީ އޭނާ އެންމެ އެދޭ އެއް ކަންތައް ކަމުގައި ވެފައިވާ ކަމަށް ސޯނޫ ބުނެފައިވެއެވެ.
ވެކްސިން ޖެހުމާއިމެދު މީހުން ހޭލުންތެރި ކުރުވަން ނިކުމެ ސޯނޫ ބުނެފައިވަނީ އާންމުންގެ ތެރޭގައި ވެކްސިންއާއި ބެހޭގޮތުން ވަރަށް ބޮޑެތި އޮޅުންތައް އުފެދިފައިވާ ކަމަށެވެ. "ގިނަ މީހުން އަދިވެސް ވެކްސިން ޖަހަންވީތޯ ނުވަތަ ނޫންތޯ ސުވާލު އުފެދޭ" ސޯނޫ ބުންޏެވެ.
ސޯނޫ ބުނެފައިވާ ގޮތުގައި މީހުންނަށް ވެކްސިން ޖެހުމުގެ މުހިއްމުކަން ބުނެދިނުމަށް އޭނާ ވިސްނާފައިވަނީ މުޅި އިންޑިއާ ހިމެނޭ ގޮތަށް އަމްރިތްސަރްއިން ފެށިގެން ދަތުރުތަކެއް ކުރުމަށެވެ.
ވެކްސިން ޖެހުމުގެ މުހިއްމުކަން އާންމުންނަށް ބުނެދިނުމުގެ ގޮތުން ސޯނޫ ވެސް ވަނީ މިއަދު ވެކްސިން ޖެހުމަށް ނިންމާފައެވެ. ސޯނޫގެ ޚިދުމަތްތަކުގެ އަގު ވަޒަންކޮށް އޭނާއަށް ދަނީ ގިނަ އެވޯޑްތަކެއް ވެސް ލިބެމުންނެވެ.