"ޕިޗް-އަޕް: ޔޫތް އެންޓްރޮޕްރިނުއާރޝިޕް ޗެލެންޖް" ފަށައިފިއެވެ.
މި މުބާރާތަކީ ޒުވާނުންނަށް ވަޒީފާގެ ފުރުސަތު ފަހިކޮށްދިނުމާއި ޓެކްނިކަލް ވޮކޭޝަނަލް ދާއިރާ އާއި ވިޔަފާރީގެ ހުނަރުތައް ތަރައްޤީ ކުރުމުގެ މަގުސަދުގައި މީރީ ޕްރޮޖެކްޓުގެ ފަރާތުން ކުރިޔަށް ގެންދާ މުބާރާތެކެވެ. މި މުބާރާތް އިފްތިތާޙް ކޮށްދެއްވީ މިނިސްޓަރ އޮފް ހަޔަރ އެޑިއުކޭޝަން ޑރ. އިބްރާހިމް ޙަސަންއެވެ.
މުޅި ރާއްޖެއަށް ހުޅުވާލައިގެން ކުރިޔަށް ގެންދާ މި މުބާރާތުގައި ބައިވެރިން ހުށަހަޅާ ޚިޔާލުތަކުގެ މައްޗަށް ބިނާކޮށް 40،000 ޑޮލަރުގެ އެހީތެރިކަން ފޯރުކޮށްދޭނެ ކަމަށް އިންތިޒާމްކުރި ފަރާތުން ބުނެއެވެ. މި ފުރުސަތު ވެގެންދާނީ އަމިއްލައަށް އަލަށް ވިޔަފާރީގެ ދާއިރާއަށް ނިކުތުމަށް ޝައުޤުވެރިވާ ފަރާތްތަކަށް ލިބިގެންދާނެ ރަނުގެ ފުރުސަތަކަށެވެ.
އެކި ފިޔަވައްސަށް ބަހާލައިގެން ކުރިޔަށް ގެންދާ މި މުބާރާތުގެ ފުރަތަމަ ފިޔަވަހީގައި އޮތީ ބައިވެރިންގެ ހިޔާލު ހުށަހެޅުމެވެ. އެއަށް ފަހުގައި ބޫޓްކޭމްޕް ތަމްރީން ފުރިހަމަ ކުރާ ފަރާތްތަކަށް ފައިނަލް ޕްރޮޖެކްޓެއް ހުށަހެޅުމުގެ ފުރުސަތު ލިބިގެންދާނެއެވެ. އޭގެ ފަހުގައި ބައިވެރިންގެ ފަރާތުން ހުށަހެޅުނު ޚިޔާލުތައް ޖަޖުންގެ ޕެނަލެއްގައި ޕިޗް ކުރުމުގެ ފުރުސަތު ލިބޭނެއެވެ. މި ޖަޖުންގެ ޕެނަލް އެކުލަވާލެވިފައި ވަނީ ރާއްޖޭގެ އިތުރުން ބައިނަލްއަގުވާމީ ޖަޖުންވެސް ހިމެނޭ ގޮތަށެވެ.
ހިޔާލު ހުށަހެޅޭނެ ދާއިރާތަކުގެ ތެރޭގައި ފަތުރުވެރިކަން، ޢުމްރާނީ މަސައްކަތް، އައިސީޓީ، އަދި ދަނޑުވެރިކަން ހިމެނެއެވެ. މި ޕްރޮޖެކްޓަކީ މިނިސްޓްރީ އޮފް ހަޔަރ އެޑިއުކޭޝަނާއި މިނިސްޓްރީ އޮފް އިކޮނޮމިކް ޑިވޮލޮޕްމަންޓް ގުޅިގެން ވޯރލްޑް ބޭންކުގެ އެހީގައި ހިންގާ 20 މިލިއަން ޑޮލަރުގެ 5 އަހަރު ދުވަހުގެ މަޝްރޫއެކެވެ.
އުމުރުން 18 އަހަރާއި 35 އަހަރާއި ދެމެދުގެ ކޮންމެ ފަރާތަކަށް ވެސް މި މުބާރާތުގައި ބައިވެރި ވުމުގެ ފުރުސަތު ވަނީ ހުޅުވާލެވިފައެވެ. މި މުބާރާތާއި ގުޅޭ އިތުރު މައުލޫމާތު މީރީ ޕްރޮޖެކްޓުގެ ވެބްސައިޓްގައްޔާއި ސޯޝަލް މީޑިއާ ޕްލެޓްފޯމް ތަކުގައި އާންމުކޮށް ފެންނާން ހުންނާނެއެވެ.