ފުލުހުންނާ ދިމާއަށް ގަލާއި ފުޅި ފަދަ ތަކެތި އުކައި، ފުލުހުންގެ ވާޖިބަސް ހުރަސް އަޅައި ނުކިޔަމަންތެރިކަން ދައްކައިގެން މިދިޔަ ހޮނިހިރު ދުވަހުގެ ރޭ އައްޑޫން ހައްޔަރު ކުރި ހަތަރު މީހުންގެ މައްޗަށް ދައުވާ ކުރަން ޕްރޮސެކިއުޓަ ޖެނެރަލް (ޕީޖީ) އޮފީހަށް ފޮނުވައިފި އެވެ.
ފުލުހުންގެ އޮފިޝަލަކު ވިދާޅުވީ އެ މައްސަލާގައި ދައުވާ ކުރަނީ ސ. ހިތަދޫ ކުދީނާގޭ އިބްރާހީމް ޝަރީފާއި މަރަދޫފޭދޫ ބިއުޓީރޯސް ހުސައިން ފާރިޝް އާއި ފޭދޫ ރަށްދެބައިގޭ އިބްރާހީމް ޝަފީގާއި ފޭދޫ ލައިވް ހުސައިން މަރުސޫމްގެ މައްޗަށް ކަމަށެވެ.
އެ ހަތަރު މީހުން ފުލުހުން ހައްޔަރު ކުރީ ރިޔާސީ އިންތިހާބް އަވަސް ކުރަން ގޮވާލައި، އެމްޑީޕީގެ ސަޕޯޓަރުންތަކެއް ހޮނިހިރު ދުވަހުގެ ރޭ ފޭދު އާއި މަރަދޫފޭދޫ ކޯޒްވޭ ބަންދުކޮށްގެން ކުރި އިހުތިޖާޖުގެ ތެރެއިންނެވެ.