މިހާރު އިލެކްޝަންސް ކޮމިޝަނުން ރިޔާސީ އިންތިޚާބު ބޭއްވެވުމަށް ހަމަޖައްސަވާފައިވާ ތާރީޚުތަކުގައި އިންތިޚާބު ބާއްވަވާ ނަމަ، 11 ނޮވެމްބަރ 2008 ގައި ފެށުނު ރިޔާސީ ދައުރު ހަމަވާއިރު، ޤާނޫނު އަސާސީގެ 111 ވަނަ މާއްދާގައިވާ ގޮތުގެ މަތިން އިންތިޚާބުކޮށްފައިވާ ރައީސަކު ނެތުމުގެ ފުރުސަތު އޮތުމާ އެކު، މި ޙާލަތަކީ ޤާނޫނީ މައްސަލަތަކެއް ދިމާވާނެ ޙާލަތަކަށްވާތީ، އަދި މި މައްސަލަ ޙައްލު ކުރެއްވުން އެންމެ އެކަށީގެންވަނީ ރައްޔިތުންގެ މަޖިލީހުގެ ތެރެއިން ކަމުގައިވާތީ، މި މައްސަލައަށް ޙައްލެއް ހޯއްދެވުމުގެ މަސައްކަތް، ރައްޔިތުންގެ މަޖިލީހުން އިސް ނަންގަވައިގެން ކުރިއަށް ގެންގޮސް ދެއްވުން އެދިވަޑައިގެން ރައީސް ޑރ. މުޙަންމަދު ވަޙީދު، ރައްޔިތުންގެ މަޖިލީހުގެ ރައީސް ޢަބްދުﷲ ޝާހިދަށް މިއަދު ސިޓީފުޅެއް ފޮނުއްވައިފި އެވެ.
ރައީސް ވިދާޅުވެފައި ވަނީ ނޮވެމްބަރު 11، 2013 އަށް އެ މަނިކުފާނުގެ ރިޔާސީ ދައުރު ހަމަވުމުން މަގާމުގައި ދެމި ނުހުންނަވާނެ ކަމަށެވެ.
އެހެން ނަމަވެސް އިލެކްޝަން ކޮމިޝަނުން ރިޔާސީ އިންތިހާބުގެ ފުރަތަމަ ބުރު ނޮވެމްބަރު 9 ގައި ބާއްވަން ނިންމުމުން، ނޮވެމްބަރު 11 އަށް ރައީސަކަށް ހުވާ ނުކުރެއްވޭނެތީ ޑރ. ވަހީދު މަގާމުގައި ހުންނެވުމަށް ބައެއް ޕާޓީތަކުން ވަނީ އެދިފަ އެވެ.
އީސީން ބުނީ އިންތިހާބުގެ ދެވަނަ ބުރަކަށް ދާން ޖެހިއްޖެ ނަމަ ދެވަނަ ބުރު ބާއްވާނީ ނޮވެމްވަރު 16 ގައި ކަމަށެވެ.