ރައްޤީގެ އެންމެ މުހިންމު އެއް ވަސީލަތަކީ ވޯޓު ދިނުމުގެ ހައްޤު ކަމަށް އެމްޑީޕީގެ ރިޔާސީ ކެންޑިޑޭޓް އަދި ކުރީގެ ރައީސް މުޙައްމަދު ނަޝީދު ވިދާޅުވެއްޖެ އެވެ.
ދިވެހިންގެ ހިތްތަކުގެ އުދާސް ދެނެގަތުމަކީ ސިޔާސީ ލީޑަރުންގެ ވަޒީފާކަމަށާއި، އެމްޑީޕީގެ އަމާޒަކީ އެއީ ކަމަށް ނަޝީދު ރޭ ވިދާޅުވި އެވެ.
ހިތުގައިވާ ސުވާލަކީ އެއްބުރުން އެމްޑީޕީ ކާމިޔާބު ކުރާނެތޯ އުފެދޭ ސުވާލު ނޫންކަމަށާއި، އެއީ އިންތިޚާބެއް އޮންނާނީ ކޮން ދުވަހަކުންތޯ އާއިމެދު އުފެދޭ ސުވާލު ކަމަށް އެ މަނިކުފާނު ވިދާޅުވި އެވެ.
ގާނޫނު އަސާސީ ބަޔާން ކުރާ ތާރީޚުގައި، އަދި ގާނޫނު އަސާސީން ބޭރު ތާރީޚުން ބާއްވަން އުޅެ އިންތިޚާބު ނުބޭއްވުނުކަން ފާހަގަ ކުރައްވާ ނަޝީދު ވިދާޅުވީ 9 ނޮވެމްބަރުގައި އިންތިޚާބު ބާއްވާކަން ކަށަވަރު ކުރަން ޖެހޭ ކަމަށެވެ.
ރައީސް މައުމޫނުގެ ވެރިކަމުގައި ނެގުނު ވޯޓުތައް ގަނޑުކޮށް ވޯޓު އަޅައިފައިވާ ކަމަށާއި، އެމްޑީޕީ އާ އިދިކޮޅު ފަރާތްތަކަކީ ދުވަހަކު ވެސް ވޯޓުން މޮޅުވި ބައެއް ނޫން ކަމަށް ރައީސް ނަޝީދު ވިދާޅުވި އެވެ.
އެ ބޭފުޅުންނަކީ ޑިމޮކްރެސީގެ ސަގާފަތަށް ކުޑަކޮށްވެސް ބޯލަނބަން ބޭނުންވާ ބައެއް ނޫން ކަމަށް އެ މަނިކުފާނު ވިދާޅުވި އެވެ. އަދި ވިސްނާ، އަޑު އައްސަވެމުށް ރައީސް މައުމޫނަށް އިލްތިމާސް ކުރައްވާ ނަޝީދު ވިދާޅުވީ ވޯޓު ހުއްޓުވުމަށް މަސައްކަތްކޮށް، ގާނޫނު އަސާސީގެ ބާރު ކަނޑުވާލިކަން އަމިއްލަފުޅަށް ދަލީލު ދައްކަމުން ދާ ކަމަށެވެ.
ރައްޔިތުން ތިބީ މައުމޫނަށް ޖާގަދޭކަށް ނޫންކަމަށް ވިދާޅުވި އެވެ. ރައީސް މައުމޫނު މަސައްކަތްކުރައްވަނީ ގޮނޑިކޮއްކޮ ވަހީދު ބޭނުންކޮށްގެން ވެރިކަން ދެމެހެއްޓުމަށްކަމަށް ނަޝީދު ވިދާޅުވި އެވެ.
ވޯޓު ފުރަތަމަ ފަހަރު ހުއްޓާލީ ފަނޑިޔާރުގެކަން ފާހަގަ ކުރައްވާ ނަޝީދު ވިދާޅުވީ ރައްޔިތުން ތިބީ ގެއަށް ވަންނަން ނޫން ކަމަށް ފަނޑިޔާރުންނަށް އެނގެން ޖެހޭ ކަމަށް ނަޝީދު ވިދާޅުވިއެވެ.
ދެވަނަ ފަހަރު ހުއްޓުވީ ފުލުހުން ލައްވާ ކަމަށާއި، އެކަން ހިއުމަން ރައިޓްސް ކޮމިޝަނުން ވެސް ފާހަގަކުރައްވާ ކަމަށް އެ މަނިކުފާނު ވިދާޅުވި އެވެ.
ފުލުހުންގެ ތެރެއިން ނުކިޔަމަންތެރިކަމުގައި ހައްދު ފަހަނައަޅައިފައިވާ ކުދިން ހައްމަތަ ކުރަންޖެހޭ ކަމަށާއި މިއަދު މަޖިލީހުގެ އަޣްލަބިއްޔަތު އޮތީ ރައްޔިތުންނަށް ކަމަށް ނަޝީދު ވިދާޅުވި އެވެ. އަދި ޕްރޮސެކިއުޓަ ޖެނެރަލް އަށް އަބްދުﷲ ރިޔާޒްގެ މައްޗަށް ދައުވާ ކުރަން ނުވަތަ އެ މަގާމުން ފައިބާ ވަޑައިގަތުމަށް އަންގަން ޖެހޭ ކަމަށް ވެސް ވިދާޅުވި އެވެ.
ހިއުމަން ރައިޓްސް ކޮމިޝަނުން ސާފްކޮށް ވޯޓު ހުއްޓުވީ ފުލުހުންކަމަށް ބުނެފައިވާކަން ފާހަގަ ކުރައްވާ ނަޝީދު ވިދާޅުވީ ބާޣީ ވަހީދާއި، އަބްދުﷲ ރިޔާޒް ރައްޔިތުންގެ ވޯޓު ދިނުމުގެ ހައްގަށް އަރައިގަތުމަކީ ކުޑަ ކުށެއް ނޫން ކަމަށެވެ.
ގާނޫނީ ސަރުކާރެއް 7 ފެބްރުއަރީގައި ވައްޓާލުމަށް ފަހު، ފަހުން ފެނުނީ ފަނޑިޔާރުންނަށް ނުފޫޒު ފޯރުވާ ސައްހަ އިންތިޚާބެއް ބާތިލް ކުރި ތަން ކަމަށް ނަޝީދު ވިދާޅުވި އެވެ.