ފިލްމް "ވަގުތު" ގެ "އެ މެރޭ ޒޮހަރަ ޖަބީން" އާއި "ޝޯލޭ" ގެ "ޔޭ ދޯސްތީ" ފަދަ މަޝްހޫރު ރީތި ހިތްގައިމު ކްލަސިކް ލަވަތަކެއް ކިޔާފަައިވާ އިންޑިއާގެ ކުރީގެ މަޝްހޫރު ލަވަ ކިއުންތެރިޔާ މަންނާ ޑޭ 94 އަހަރުގައި މިއަދު މަރުވެއްޖެ އެވެ.
އޭނާ މަރުވީ މުމްބާއީގެ ޕްރައިވެޓް ހޮސްޕިޓަލެއްގައި މީގެ ހަތަރު މަހެެއްހާ ދުވަސް ކުރިން އެޑްމިޓްކޮށް، ވެންޓިލޭޓަރުގެ އެހީގައި ފަރުވާ ވެސް ދެމުން ދަނިކޮށް މިއަދުގެ ފަތިހުގެ ވަގުތެއްގަ އެވެ.
ޖުލައި މަހުގެ ތެރޭގައި މަންނާ އެޑްމިޓް ކުރީ ނޭވާލާން ދަތިވެ، މޭގައި ވަރަށް ބޮޑަށް ރިއްސަން ފެށުމާ ގުޅިގެން ކަމަށް އާއިލާގެ ފަރާތުން ވަހަކަ ދެއްކި މީހަކު ބުންޏެވެ.
މަންނާ ޑޭ މަރުވި އިރު އޭނާގެ ދެ އަންހެން ދަރިންގެ ތެރެއިން ދޮށީ ދަރިފުޅު ރާމާ އިނީ ބައްޕަގެ ގާތުގަ އެވެ.
އެހެން ނަމަވެސް ހަގު ދަރިފުުޅު ސުމީތާ ހުރީ އެމެރިކާގަ އެވެ.
ހަތަރު ހާހަށް ވުރެ ގިނަ ލަވަ ހިންދީ ބަހުންނާއި ބެންގާލީ އަދި މަރާމާތީ ބަހުން މަންނާ ޑޭ ކިޔާފައިވެ އެވެ.
އޭނާގެ ލަވަ ކިއުމުގެ ކެރިއަރު ފެށީ 1943 ގައި ފިލްމް "ތަމަންނާ" އިންނެވެ.
އިންޑިއާގެ ސިނަމާއަށް އޭނާ ކޮށްދީފައިވާ ހިދުމަތުގެ އަގު ވަޒަންކޮށް އިންޑިއާ ސަރުކާރުން ދޭ ޝަރަފްވެރި އެވޯޑް ދާދާ ސާހެބް ޕަލްކޭ އެވޯޑް ވެސް 2007 ވަނަ އަހަރު މަންނާ ޑޭ އަށް ވަނީ އަރުވައިފަ އެވެ.
މީގެ އިތުރުން ވެސް ގިނަ އެވޯޑްތަކެއް އޭނާ ވަނީ ހާސިލްކޮށްފަ އެވެ.
މަންނާ ޑޭގެ ފާހަގަކޮށްލެވޭ އިތުރު ލަވަތަކުގެ ތެރޭގައި ރާޖް ކަޕޫރުގެ "ޝްރީ 420" ގެ "ޕިޔާރު ހުއާ އިކްރާރު ހުއާ"، މަރުހޫމް ރާޖޭޝް ކަންނާގެ "އާނަންދު" ގެ "ޒިންދަގީ ކެެއިސޭ ހޭ ޕަހޭލީ"، އަމީތާބްގެ "ޒަންޖީރުގެ "ޔާރީ ހޭ އިމާމް މޭރާ" ފަދަ ލަވަތައް ހިމެނެ އެވެ.