މަސްތުވާތަކެތީގެ ގާނޫނާ ބެހޭ 123 މާއްދާގެ (ށ) އަށް ރައްޔިތުންގެ މަޖިލީހުގެ އެމްޑީޕީ މެމްބަރު އަހުމަދު އީސާ ހުށަހެޅުއްވި އިސްލާހަށް ތާއީދު ނުކުރައްވާ ކަމަށް ސ. ހިތަދޫ އަވަށު ބޯޑްގެ ރައީސް އިބްރާހީމް ޝިނާޒް މޫސާ މިއަދު ވިދާޅުވެއްޖެ އެވެ.
މަސްތުވާތަކެއްޗާ ބެހޭ ގާނޫނުގެ 123 ވަނަ މާއްދާގެ (ށ) ގައި ބުނަނީ "ކުޑަކަމުދާ ތަކެތި ދޭން އިންކާރުކޮށްފި ނަމަ އެއް އަހަރަށް ޖަލަށް ލެވޭނެ" ކަމަށެވެ.
އެހެން ނަމަވެސް ރައްޔިތުންގެ މަޖިލީހުގެ ކެނދިކުޅުދީ ދާއިރާގެ އެމްޑީޕީގެ މެމްބަރު އީސަ ހުށަހެޅުއްވި އިސްލާހުގައި ބުނަނީ ކުޑަކަމުދާ އެއްޗެހި ދޭން އިންކާރު ކުރާ މީހާ އަށް ދެވޭ އެންމެ ބޮޑު އަދަބަކީ 15 ދުވަހަށް ޖަލަށް ލުމާއި މަސް ދުވަހަށް ގޭ ބަންދު ކުރުމާއި ޖޫރިމަނާ ކުރުމުގެ އަދަބު ކަމަށެވެ.
މިކަމާ ގުޅިގެން ޝިނާޒް އޭނާގެ އެފްބީ ސްޓޭޓަސްގައި ވިދާޅުވެފައި ވަނީ "އަހުމަދު އީސާ ހުށަހެޅުއްވި އިސްލާހަށް އަޅުގަނޑު ތާއީދު ނުކުރަން" ކަމަށެވެ.
"ފުލުހުން 123 ވަނަ މާއްދާ ސިޔާސީ މަގުސަދެއްގައި ބޭނުން ކުރަމުންދާ ކަމަށް ބުނެ އިސްލާހު ހުށަހެޅުއްވި އިރު، ކުޑަކަމުދާ ތަކެތި ދޭން އިންކާރު ކުރެއްވި އެމްޑީޕީގެ ދެ އެމްޕީގެ މައްސަލަ ކޯޓްގައި ހިނގަމުންދާކަން ފާހަގަ ކުރަން. އަދި އެ ބަޔާން ކުރެއްވި ސަބަބު ހަގީގަތެއް ކަމުގައި ވިޔަސް ވެސް އެއީ ގާނޫނު އަސާސީ އަށް އިސްލާހު ގެންނަން ޖެހޭ ސަބަބެއް ކަމުގައި އަޅުގަނޑު ގަބޫލެއް ނުކުރަން،" ޝިނާޒް ވިދާޅުވި އެވެ. "123 ވަނަ މާއްދާގެ ދަށުން ކިތަންމެ ގިނަ ބަޔަކަށް ވެސް ހުކުމް ކުރެވިފައިވާ އިރު، މެމްބަރަކަށް ވިޔަސް ސާބިތުވެއްޖެ ނަމަ އެ ހުކުމް ކުރެވެން ޖެހޭނެ. ދެރަ މީހާ އަށް ދެރަ ގޮތް، މޮޅު މީހާ އަށް މޮޅު ގޮތް އޮވެގެން ދުވަހަކު ވެސް މި ގައުމަށް ހަމަޖެހުމެއް ނާންނާނެ."
އެހެންވެ ޝިނާޒް އިތުރަށް ވިދާޅުވެފައި ވަނީ "ވަރަށް އިހުލާސްތެރިކަމާ އެކު ދިވެހި ރައްޔިތެއްގެ ހައިސިއްޔަތުން އެ އިސްލާހު އަނބުރާ ގެންދެވުމަށް މެމްބަރު އަހުމަދު އީސާ އަށް ގޮވައިލާ" ކަމަށެވެ.