ލޯކަލް ކައުންސިލްތަކުގެ އިންތިހާބުގައި ކާމިޔާބީ ހޯއްދެވި ހުރިހާ މޭޔަރުންނަށް ފޯނުން ގުޅުއްވައި ރޭ ރައީސް މަރުހަބާ ވިދާޅުވި ކަމަށް ރައީސް އޮފީހުގެ ތަރުޖަމާނު މަބްރޫކް އަޒީޒް ވިދާޅުވެއްޖެއެވެ.
ރައީސް @ibusolih އިއްޔެ ބޭއްވި ލޯކަލް ކައުންސިލްތަކުގެ އިންތިޚާބުގައި ކާމިޔާބީ ހޯއްދެވި ހުރިހާ މޭޔަރުންނަށް ފޯނުން ގުޅުއްވައި މަރުޙަބާ ވިދާޅުވި. އަދި ލާމަރުކަޒީ ނިޒާމުގެ ތެރެއިން ތަރައްޤީގެ މަޝްރޫޢުތައް ހިންގުމުގައި ފުރިހަމަ އެއްބާރުލުން ދެއްވާނެކަމުގެ ޔަޤީންކަން ދެއްވި.
— Mabrook Azeez (@MvSpokesperson) April 11, 2021
މަބްރޫކްގެ ޓްވީޓްގައި އިތުރަށް ވިދާޅުވެފައިވަނީ ލާމަރުކަޒީ ނިޒާމުގެ ތެރެއިން ތަރައްޤީގެ މަޝްރޫޢުތައް ހިންގުމުގައި ފުރިހަމަ އެއްބާރުލުން ދެއްވާނެކަމުގެ ޔަޤީންކަން ރައީސް މޭޔަރުންނަށް ދެއްވި ކަމަށެވެ.
މާލެ ސިޓީގެ މޭޔަރަށް އިންތިހާބުވެވަޑައިގަތީ އިދިކޮޅު ކެންޑިޑޭޓު ޑރ. މުހައްމަދު މުއިއްޒު އެވެ. އައްޑޫ ސިޓީގެ ގޮނޑި ކާމިޔާބު ކުރެއްވީ އެމްޑީޕީގެ ކެންޑިޑޭޓު އަލީ ނިޒާރު އެވެ. ވަގުތީ ނަތިއްޖާ ދައްކާ ގޮތުން ފުވައްމުލައް ސިޓީގެ މޭޔަރަކަށް އިންތިހާބުވީ އެމްޑީޕީ ކެންޑިޑޭޓު، އިސްމާއީލް ރަފީގު (އިއްސޭ) އެވެ. އަދި މީގެ އިތުރުން އަލަށް ސިޓީއެއްގެ ގޮތުގައި ކަނޑައެޅި ކުޅުދުއްފުށީގެ ފުރަތަމަ މޭޔަރަށް އިންތިހާބޫ އެމްޑީޕީގެ ކެންޑިޑޭޓު މުހައްމަދު އާތިފް އެވެ.