އައްޑޫގައި މިހާރު ހަރަކާތްތެރިވަމުން އަންނަ ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) ގެ ޓީމާ އައްޑޫގެ ހާލަތާ ބެހޭ ގޮތުން މައުލޫމާތު ހިއްސާ ކުރައްވާފައިވާ ކަމަށް މޭޔަރު އަބްދުﷲ ސޯދިގް (ސޯބެ) ވިދާޅުވެއްޖެ އެވެ.
ސޯބެ ވިދާޅުވީ އެޗްއާރްސީއެމް އާ ބައްދަލު ކުރަން އެހާ ބޮޑަށް މީގެ ކުރިން ފުރުސަތު ލިބިފައި ނުވި ނަމަވެސް އެ ޓީމްގެ ބޭފުޅުންނާ ބުދަ ދުވަހު އެކިއެކި ކަންކަމާ ގުޅޭ ގޮތުން ވަރަށް ފުޅާކޮށް ވާހަކަ ދައްކާނެ ފުރުސަތު ލިބުނު ކަމަށެވެ.
އެޗްއާރްސީއެމްގެ ޓީމްގައި އިސްކޮށް ހުންނެވީ އެ ކޮމިޝަންގެ ނައިވް ރައިސް މުހައްމަދު ތޮލާލެވެ.
ސޯބެ ވިދާޅުވީ މައުލޫމާތު ހިއްސާ ކުރެއްވިު ކަންތައްތަކުގެ ތެރޭގައި ފުލުހުންނާ ގުޅޭ ގޮތުން ފާހަގަ ކުރެވިފައި ހުރި ކަންކަމާއި ކޯޓާއި ޝަރުއީ ދާއިރާގެ ތެރެއިން ކުރިމަތިވެފައި ހުރި ދަތިތަކާ ބެހޭ ގޮތުން ވާހަކަ ދެއްކެވި ކަމަށެވެ.
އޭގެ ތެރޭގައި އެކިއެކި ކުށްތަކާއި ކުށްތަކުގައި ހިމެނި، އެކިއެކި މަރުހަލާތަކުގައި ކަންކަން ގޮސްފައިވާ ގޮތާ ބެހޭ ގޮތުން ވެސް އެޗްއާރްސީއެމާ މައުލޫމާތު ހިއްސާ ކުރެއްވި ކަމަށް މޭޔަރު ވިދާޅުވި އެވެ.