ސ. ހިތަދޫ މެޖިސްޓްރޭޓް ކޯޓްގައި ހިނގަމުންދާ މައްސަލައަކާ ގުޅިގެން ސ. ހިތަދޫ ދެކުނު ދާއިރާގެ ކައުންސިލަރު ހުސައިން ފަހުމީ ކޯޓްގައި މިއަދު އޮތް އަޑު އެހުމަށް ހާޒިރުވުމަށް، ކޯޓްގެ ޗިޓާ ހަވާލު ނުވުމުން ފުލުހުންގެ ބެލުމުގެ ދަށުގައި ބަހައްޓައިގެން އޭނާ ކޯޓަށް ހާޒިރު ކުރަން ފުލުހުންގެ މައްޗަށް އަމުރެއް ނެރެފި އެވެ.
މިކަން ފުލުހުން ވެސް ވަނީ ކަށަވަރުކޮށްދީފަ އެެވެ. އެހެން ނަމަވެސް ފަހުމީ އާ ގުޅޭ ނުވެގެން ފުލުހުންނަށް ވެސް، ފަހުމީ އަށް އެކަން ނޭންގިގެން އުޅޭ ކަމަށް މައުލޫމާތު ލިބިފައިވެ އެވެ.
ކޯޓްގެ މީޑިއާ އޮފިޝަލް ވިދާޅުވީ ބަންދުގައި ބަހައްޓައިގެން ފަހުމީ ކޯޓަށް ހާޒިރު ކުރަން ފުލުހުންގެ މައްޗަށް އަމުރެއްކޮށްފައިވާ އިރު، މެންދުރު ފަހު 2:00 އަށް އަޑު އެހުން ތާވަލްކޮށްފައިވާ ކަމަށެވެ.
ފަހުމީގެ އިތުރުން މޭޔަރު އަބްދުﷲ ސޯދިގާއި މެދު ދާއިރާގެ ކައުންސިލަރު ހުސައިން ހިލްމީގެ މައްޗަށް ދައުވާ ކުރަނީ ބިމެއްގަ މައްސަލައިގަ އެވެ.
އެ ތިން ބޭފުޅުންގެ މައްޗަށް ދައުވާ ކުރަނީ ހިތަދޫ ޕިންޕޮންގޭ ނަސީރާ އަހުމަދެވެ.
އެގޮތުން މި މައްސަލައިގެ ފުރަތަމަ އަޑު އެހުމަށް ބުރާސްފަތި ދުވަހު ހާޒިރުވުމަށް މިދިޔަ ބުދަ ދުވަހު މޭޔަރު ޗިޓާ ހަވާލުވެ ވަޑައިގަތުމަށް ފަހު، ކޯޓަށް ހާޒިރުވެވަަޑައި ނުގަތުމުން 75ރ. އިން ވަނީ ޖޫރިމަނާކޮށްފަ އެވެ.
އަދި ހިލްމީ އާ އެ ދުވަހު ޗިޓް ހަވާލު ނުކުރެވުނު ނަމަވެސް ފަހުން ވަނީ ޗިޓް ހަވާލުކޮށްފަ އެވެ.