ހއ. އަލީދޫ ރިސޯޓުގެ ޖެނެރަލް މެނޭޖަރެއްގެ މަގާމުގައި ހުންނެވި ސ. ހުޅުދޫ ރީފްސައިޑް ޖާދުﷲ ޖަމީލުގެ މައްޗަށް ދައުލަތުން ކުރާ ކެނަބިހުން މުއާމަލާތް ކުރުމުގެ ކުށުގެ ދައުވާ އަށް އޭނާ އިންކާރު ކުރައްވައިފި އެވެ.
ޖާދުﷲ މިކަމަށް އިންކާރުކޮށްފައި ވަނީ ދައުލަތުން އޭނާގެ މައްޗަށް ކުރާ މިދައުވާގައި އިއްޔެ ކްރިމިނަލް ކޯޓްގައި ބޭއްވުނު އަޑު އެހުމުގަ އެވެ.
ކްރިމިނަލް ކޯޓުގައި އިއްޔެ ބޭއްވި ޝަރީއަތުގެ މަޖިލީހުގައި ޖާދުﷲގެ ގާނޫނީ ވަކީލާ ވިދާޅުވީ ކެނަބިހުން މުއާމަލާތް ކުރުމުގެ ކުށުގެ ދައުވާ އަށް ޖާދުﷲ އިންކާރު ކުރައްވާ ކަމަށެވެ.
ޖާދުﷲގެ މައްޗަށް ކުރެވޭ ކެނަބިހުގެ މި ދައުވާއަކީ މިދިޔަ އަހަރުގެ ނޮވެމްބަރު މަހުގެ 16 ވަނަ ދުވަހުގެ ފަތިހު ހދ. ހޮނޑައިދޫ އުތުރު ފަރާތުގައި ބާއެއްގެ ގޮތަށް ހަދާފައިވާ ހަޓެއްގެ ކައިރިން އިތުރު ބަޔަކާ އެކު ފުލުހުންނަށް ޖާދުﷲ ފެނުނު އިރު އޭނާ ހުރި ދިމާލުން ބިންމަތިން ކެނަބިސް ފެނިފައިވާތީ ކުރެވޭ ދައުވާއެކެވެ.
ދައުލަތުން ކުރާ މި ދައުވާ އަށް ޖާދުﷲ އިންކާރު ކުރެއްވުމުން އޭނާގެ މައްޗަށް ދައުވާ ސާބިތު ކުރުމަށް ދައުލަތުން ވަނީ ހެކި ހުށަހަޅާފަ އެވެ.
އެގޮތުން ހެކީންގެ ގޮތުގައި ދައުލަތުން ހުށަހަޅާފައި ވަނީ ހާދިސާ ހިނގިތަނަށް ދިޔަ ތިން ފުލުހަކާއި މަސްތުވާތަކެތީގެ ތަހުލީލު ރިޕޯޓެވެ.
ޖާދުﷲގެ މައްޗަށް ދައުލަތުން ކުރާ ދައުވާ އަށް ދައުލަތުގެ ފަރާތުން ހެކި ހުށަހެޅުއްވުމުން ޖާދުﷲގެ ފަރާތުން ވެސް ހެކިހުށަހަޅާފައިވެ އެވެ.
އެގޮތުން ޖާދުﷲގެ ފަރާތުން ހުށަހަޅާފައި ވަނީ ތިން ފުލުހެއްގެ ނަމެވެ. އެ ފުލުހުންނަކީ ހދ. ކުޅުދުއްފުށީ ޕޮލިސް ޓޭޝަންގައި މަސައްކަތް ކުރާ ތިން ފުލުހެއް ކަމަށް ޖާދުﷲގެ ވަކީލު ވިދާޅުވި އެވެ.
އިއްޔެ އޮތް ޝަރީއަތުގެ މަޖިލިހުގައި ޖާދުﷲގެ ފަރާތުން ހެކީންގެ ގޮތުގައި ހުށަހެޅުއްވި ތިން ފުލުހުންގެ ފުރިހަމަ ނަމާއި އެޑްރެސް މިއަދު 12:00 ގެ ކުރިން ކޯޓަށް ހުށަހެޅުމަށް ގާޒީ ވަނީ އަންގާފަ އެވެ.