މި އަހަރުގެ އެންމެ އުންމީދީ ފިލްމްތަކުގެ ތެރޭގައި ހިމެނޭ އަދި ގިނަ ބަޔަކު ކެތްތެރި ކަމެއް ނެތި އިންތިޒާރު ކުރަމުން އަންނަ "ދޫމް 3" ގެ ޓްރެއިލާ މީގެ ކުޑަ އިރުކޮޅެއް ކުރިން ލޯންޗްކޮށްފި އެވެ.
ޔާޝްރާޖް ފިލްމްސް (ވައިއާރްއެފް) ގެ ކާމިޔާބް ފުރެންޗައިޒް "ދޫމް" ގެ ތިން ވަނަ ފިލްމްގެ ތަރިންނަކީ ކުރީ ދެ ފިލްމެކޭ އެއްގޮތަށް އަބިޝެކް ބައްޗަން އާއި އުދޭ ޗޯޕްޅާ އާ އެކު "ދޫމް" އިން އަލަށް ފެނިގެންދާ އާމިރް ހާނާއި ކެޓްރީނާ ކެއިފެވެ.
"ދޫމް 3" ގައި އާމިރް ފެނިގެން ދާނީ ވިލަންއެއްގެ ރޯލުންނެވެ. މީޑިއާ ރިޕޯޓްތައް ބުނާ ގޮތުން މި ފިލްމުގައި އާމިރް ފެނިގެން ދާނީ ޑަބަލް ރޯލަކުންނެވެ.
އަދި މިއީ ކެޓްރީނާ އާއި އާމިރް އެކުގައި ކުޅުނު ފުރަތަމަ ފިލްމް ވެސް މެ އެވެ.
އެމެރިކާގެ ޝިކާކޯގައި މަންޒަރުތައް ނަގާފައިވާ "ދޫމް 3" ޑައިރެކްޓްކޮށްފައި ވަނީ ކުރީ ދެ ފިލްމްގެ ސްކްރީން ރައިޓަރު ވިޖޭ ކްރިޝްނާ އަޗަރިއާ އެވެ.
މި ފިލްމް ސިނަމާތަކަށް އަންނާނީ ޑިސެމްބަރުމަހުގެ 20 ވަނަ ދުވަހު އެވެ.