ލ. މާންދޫ ކްލަސްޓާ އިން އިތުރު ފަސް މީހަކު ކޮވިޑް-19 އަށް ޕޮޒިޓިވް ވެއްޖެއެވެ.
ލ.ގަން ރީޖަނަލް ހޮސްޕިޓަލުން ބުނީ މިއަދު ޕޮޒިޓިވްވި ފަސް މީހުންނާއެކު އެ ކްލަސްޓާ އިން ޕޮޒިޓިވްވި މީހުންގެ ޖުމްލަ އަދަދު 54 އަށް އަރާފައިވާ ކަމަށެވެ. އެ ކްލަސްޓާއާ ގުޅިގެން މިހާތަނަށް 256 ސާމްޕަލެއް ނަގާފައިވާއިރު ނަތީޖާ ނުލިބޭ 128 ސާމްޕަލް އެބައޮތެވެ.
މާންދޫ ފިޝަރީޒް ކޮމްޕްލެކްސް އިން އެންމެ ފުރަތަމަ ކޮވިޑަށް ބަޔަކު ޕޮޒިޓިވް ވެފައިވަނީ މިދިޔަ ހުކުރު ދުވަހުއެވެ. އެއާއެކު އެ ރަށަށް އަރާ ފޭބުން ވަނީ މަނާކޮށްފައެވެ.
މީގެއިތުރުން ކޮވިޑް ކޭސްތަކެއް ފެނުމާ ގުޅިގެން އެޗްޕީއޭ އިން އިއްޔެ ވަނީ ލ.ގަމާއި ފޮނަދޫ އަށް އަރާ ފޭބުން ވެސް މަނާކޮށްފައެވެ. ޕޮޒިޓިވް ކޭސްތައް ފެނިފައިވަނީ ގަމުން ކަމަށްވާއިރު، އެ ރަށުން ވަނީ ތިން މީހަކު ޕޮޒިޓިވްވެފައެވެ. އެއީ ކަރަންޓީނުގައި ތިބި ބައެއް ނޫނެވެ.