ގދ. ތިނަދޫއިން އިތުރު މީހަކު ކޮވިޑު-19 އަށް ޕޮޒިޓިވްވެ އެރަށުން ބައްޔަށް ޕޮޒިޓިވްވީ މީހުންގެ އަދަދު 4އަށް އަރައިފިއެވެ.
ތިނަދޫން މިއަދު ޕޮޒިޓިވްވީ މީހަކީ މި މަހުގެ 22 ވަނަ ދުވަހު ހޯމް ކަރަންޓީނުގައި ހުއްޓާ ޕޮޒިޓިވްވި ދެ މީހުންނާއި ކޮންޓެކްޓުވެފައިވާ މީހެކެވެ.
އެމީހާގެ ސާމްޕަލް ޓެސްޓު ކުރުމުން ކޮވިޑު-19 އަށް ޕޮޒިޓިވްވެފައިވާ ކަމަށް ޑރ. އަބަދުއް ސަމަދު މެމޯރިއަލް ހޮސްޕިޓަލުން ވަނީ ބުނެފައެވެ.
ތިނަދޫއިން ބަޔަކު ޕޮޒިޓިވުމާއިގުޅިގެން އެރަށް އެޗްޕީއޭއިން ވަނީ 5 ދުވަހަށް މޮނިޓަރިންއަށް ލާފައެވެ. އެއާއި އެކު ސްކޫލްތަކާއި، ކޮލެޖް/ޔުނިވާސިޓީ އަދި ޓިއުޝަން ކްލާސްތަކާއި ގުރުއާން ކްލާސްތައް އޮންލައިންކޮށް ކުރިއަށް ގެންދިޔުމާއި، ކެފޭ ރެސްޓޯރެންޓުތަކުން ގްރޫޕްތަކަށް ކޭޓަރިންގެ ހިދުމަތް ނުދިނުމާއި، ސައިހޮޓާ ރެސްޓޯރެންޓުތަކުގައި ހިދުމަތްދޭއިރު ގައިދުރުކަމާއެކު ތިބެވޭނެ އިންތިޒާމު ހަމަޖައްސަން ވަނީ އަންގާފައެވެ.
އަދި ފިހާރަތަކާއި ގާޑިޔާތަކުގެ ހިދުމަތްތައް އެޗްޕީއޭގެ ގައިޑްލައިނާ އެއްގޮތަށް ރޭގަނޑު 11 ޖަހަންދެން ހުޅުވާފައި ބެހެއްޓުމަށާއި އެއާޕޯޓު ޑިއުޓީއަށް މީހުން ދިއުމާއި އައުން މަޑުޖައްސާލުމުގެ އިތުރުން ކުޑަކުދިންގެ ޕާކުތަކާއި މިއުޒިއަމް ޕާކު ބަންދުކުރަން ވެސް ވަނީ ނިންމާފައެވެ.
މީގެއިތުރުން ރޯދަ ވީއްލަން ގޭގެއަށް ޒިޔާރަތް ކުރުމާއި، ރެސްޓޯރެންޓުތަކުގައި އާއިލީ ރޯދަވީއްލުން ނުބޭއްވުމުގެ އިތުރުން މިސްކިތަށް ދާއިރު މާސްކު އެޅުމާއި އަމިއްލަ މުސައްލާ ގެންދަން ވެސް ކައުންސިލުން ވަނީ އަންގާފައެވެ.