މަސްތުވާތަކެތި ބޭނުންކޮށް އޭގެ ވިޔަފާރި ކުރުމުގެ ތުހުމަތުގައި ސިމްބޮލިކް ރިކޯޑްސްގެ މަޝްހޫރު ރެޕް އާޓިސްޓު އިސްމާއިލް އިފްހާމް މުހައްމަދު (ޕެސްޓް)ގެ މައްޗަށް ބޮޑެތި ދައުވާތަކެއް ކޮށް މައްސަލަ ކްރިމިނަލް ކޯޓަށް ފޮނުވައިފިއެވެ.
ޕެސްޓުގެ މައްޗަށް އުފުލާފައިވަނީ ކެނެބިސް ޓްރެފިކްކުރުމުގެ ކުށުގެ ދައުވާ އާއި ޑައިމޯފިން ޓްރެފިކްކުރުމުގެ ކުށުގެ ދައުވާގެ އިތުރުން މަސްތުވާއެއްޗެއް ޓްރެފިކް ކުރުމުގެ ކުށުގެ ދައުވާ އާއި ކެނެބިސް ބޭނުންކުރުމުގެ ކުށުގެ ދައުވާގެ އިތުރުން، ކުށްކޮށްގެން ހޯދާ މުދަލާއި ފައިސާ ބޭނުންކުރުމާއި އަތުގައި ބެހެއްޓުމާއި ސިއްރުކުރުމުގެ ކުށުގެ ދައުވާ އެވެ.
ޕެސްޓު ފުލުހުންގެ ބެލުމުގެ ދަށައް ގެންދެވިފައިވަނީ މިއަހަރު ފެބްރުއަރީ މަހު މާލޭގައި ހިންގި އޮޕަރޭޝަނެއްގެ ތެރެއިންނެއެވެ. އިތުރު 3 މީހަކާއި އެކު ޕެސްޓު ހައްޔަރު ކުރިއިރު އެމީހުން އަތުން 2.5 ކިލޯގެ މަސްތުވާތަކެތި ވަނީ ފެނިފައެވެ.
ޕެސްޓު އާއި އެކު ހައްޔަރު ކުރި މީހުންގެ މައްޗަށްވެސް ވަނީ ދައުވާ އުފުލާފައެވެ.