އިންޑިއާ: ކޮވިޑްގައި މަރުވި މީހުންގެ އަދަދު ދެލައްކަ އަށްވުރެ މައްޗަށް

ދުވާލަކު 3000 އަށްވުރެ ގިނަ މަރާއިއެކު، އިންޑިއާގައި ކޮވިޑް ޖެހިގެން މަރުވި މީހުންގެ އަދަދު ދެލައްކަ އަށްވުރެ މައްޗަށް އަރައިފިއެވެ.

އިންޑިއާގެ ހާލަތު ވަރަށް ބޮޑަށް ގޯސްވެފައިވާ މި ދަނޑިވަޅުގައި އެ ޤައުމުގައި ކޮވިޑަށް ފައްސިވެފައިވާ މީހުންގެ އަދަދު ވަނީ 1.8 ކްރޯޑަށް އަރާފައެވެ. މިއަދު އާންމު ކޮށްފައިވާ ހިސާބުތަކަށް ބަލާއިރު، ފާއިތުވި 24 ގަޑިއިރު ތެރޭގައި އިންޑިއާއިން 3293 މީހުން ވަނީ ކޮވިޑް ޖެހިގެން މަރުވެފައެވެ. މި އަދަދާއެކު ޖުމްލަ މަރުވި ކަމަށް ރެކޯޑް ކުރެވުނު އަދަދު ވަނީ 201،187 އަށް އަރާފައެވެ. މިއީ މިއަދު ހެނދުނު 10:00ގައި އިންޑިއާގެ ޔޫނިއަން ހެލްތް މިނިސްޓްރީން އާންމު ކުރި އަދަދު ތަކެވެ.

ފާއިތުވި 24 ގަޑިއިރު ތެރޭގައި އިންޑިއާގައި ކޮވިޑަށް ފައްސިވީ މީހުންގެ އަދަދަކީ 3،60،960 އެވެ. މިއަދަދާއެކު ޖުމްލަ އެ ޤައުމުން ފައްސިވެފައިވާ މީހުންގެ އަދަދު މިވަނީ 1،79،97،267 އަށް އަރާފައެވެ.

އިންޑިއަން ކައުންސިލް އޮފް މެޑިކަލް ރިސާޗްއިން ހާމަކޮށްފައިވާ ގޮތުގައި އޭޕްރީލް 27 ވަނަ ދުވަހާއި ހަމަޔަށް 28،27،03،789 ސާމްޕަލް ވަނީ ކޮވިޑަށް ޓެސްޓް ކުރެވިފައެވެ.

އިންޑިއާގައި މަރުވާ މީހުންގެ އަދަދު ގިނަވުމުގެ ސަބަބުން މީހުން އެންދުމުގެ މަސައްކަތްތަކަށް ވެސް ވަނީ ޖާގަ ނުލިބުމުގެ ސަބަބުން ލަސްތަކެއް އައިސްފައެވެ. އެހެން ވުމުގެ ސަބަބުން މަރުވެފައިވާ މީހުންގެ ހަށިގަނޑުތައް އަށިތަކަށް ލާފައި މަގުމަތީގައި ގިނަ އަދަދަކަށް ބަހައްޓާފައިވެއެވެ،