ވަގަށް ނެގި ސައިކަލެއް ހޯދައި، ދެ މީހަކު ހައްޔަރު

ސ. ފޭދޫން ވަގަށް ނަގާފައިވާ ސައިކަލެއް ހޯދައި، ދެ މީހަކު ހައްޔަރުކޮށްފި އެވެ.

އެނގިފައިވާ ގޮތުގައި ވަގަށް ނެގީ ފޭދޫ މަގިގޭ ޒާހިރުގެ ސައިކަލެވެ.

މި މައްސަލަ އާ ގުޅިގެން ހައްޔަރުކޮށްފައި ވަނީ 25 އަހަރުގެ ފިރިހެނަކާއި 22 އަހަރުގެ ފިރިހެނެއް ކަމަށް ފުލުހުން ބުންޏެވެ.

މި ދެމީހުންގެ ތެރެއިން 25 އަހަރުގެ މީހާއަކީ އަމުރަށް ނުކިޔަމަންތެރިވުމާއި ވައްކަމާއި މަސްތުވާތަކެތީގެ ކުށުގެ ރެކޯޑް އޮންނަ މީހެއް ކަމަށާއި 22 އަހަރުގެ މީހާއަކީ ވައްކަމުގެ މައްސަލަތަކުގެ ކުށުގެ ރެކޯޑް އޮންނަ މީހެއް ކަމަށް ވެސް ފުލުހުން ބުންޏެވެ.

މި ދެ މީހުންގެ ތެރެއިން 25 އަހަރުގެ މީހާ ހައްޔަރުކޮށްފައި ވަނީ ފޭދޫންނެވެ. އަދި 22 އަހަރުގެ މީހާ ހައްޔަރުކޮށްފައި ވަނީ އައްޑޫ މަރަދޫން ކަމަަށް ވެސް ފުލުހުން ބުންޏެވެ.

މި މަހުގެ 28 ވަނަދުވަހު 19:30 އެހާކަށްހާ އިރު ފުލުހުންނަށް ހުށަހެޅި މި މައްސަލަ އާ ގުޅިގެން ވަގަށް ނަގާފައިވާ ސައިކަލް ހޯދާފައި ވަނީ ގަމުގައި މަސައްކަތް ކުރާ ފުލުހުން އެސައިކަލް ހޯދުމަށް ކުރަމުން ދިޔަ މަސައްކަތުން ސައިކަލް ވަގަށް ނެގި ރޭ ދަންވަރުގެ ވަގުތެއްގައެވެ. މި ސައިކަލް މިހާރު ވަނީ ވެރިފަރާތާ ހަވާލުކޮށްފަ އެވެ.

މި މައްސަލަ އާ ގުޅިގެން ހައްޔަރުކޮށްފައިވާ ދެ މީހުންގެ ބަންދާ މެދު ގޮތެއް ނިންމުމަށްޓަކައި ފޭދޫ މެޖިސްޓްރޭޓް ކޯޓަށް ހާޒިރު ކުރުމުން ވަނީ 15 ދުވަހުގެ މުއްދަތެއް ދީފަ އެވެ.