ތާރު އަޅައިގެން ހަދާފައިވާ ސ. ފޭދޫ މަގުގައި ލައިޓް ހަރު ކުރުމުގެ މަސައްކަތް ފަށައިފި އެވެ.
މި މަސައްކަތް އައްޑޫ ސިޓީ ކައުންސިލުން ހަވާލުކޮށްފައި ވަނީ އައްޑު އަށް ކަރަންޓާއި ފެނުގެ ހިދުމަތްދޭ ފެނަކަ ކޯޕަރޭޝަނާ އެވެ. މަގުގައި ބައްތި ޖެހުމުގެ މަސައްކަތް ފެށި އިރު، މިކަމުގައި މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަން (އެމްއާރްޑީސީ) އިން އަންނަނީ އެހީތެރިކަން ފޯރުކޮށް ދެމުންނެވެ.
އެގޮތުން ލައިޓް ހަރު ކުރާ ތަންތަނުގައި އަތުރާފައި ހުރި ޕޭވްމަންޓް ގާ ނަގައި، އަލުން ގާ އަތުރަނީ އެމްއާރްޑީސީގެ މުވައްޒަފުންނެވެ.
ސްރީ ލަންކާގެ އިންޓަނެޝަނަލް ކޮންސްޓްރަކްޝަން ކޮންސޯޓިއަމް (އައިސީސީ) އިން ހިލޭ ތާރު އަޅައި ދިން ފޭދޫ ބޮޑު މަގުގެ އިތުރުން ފޭދު އާއި މަރަދޫފޭދޫ ގުޅޭ ދިމާލުން ތާރު އެޅި މަގުގައި ވެސް ލައިޓް ހަރު ކުރަން ވަނީ ފަށައިފަ އެވެ.
އެގޮތުން ބޮޑު މަގުގެ ދެ ފަރާތުގައި ލައިޓް ޖަހާ އިރު، ބޮޑު މަގާ ގުޅިފައި އޮތް ތާރު މަގުގައި ލައިޓް ޖަހަން ނިންމާފައި ވަނީ މަގުގެ އެއް ފަރާތުގައި ކަމަށް ފެނަކަ އިން ބުންޏެވެ.
މި މަސައްކަތް މިހާތަނަށް ލަސްވެފައި އޮތީ ވެސް ފޭދޫ މަގުގައި ބައްތި ޖަހާނެ ގޮތަކާ ދޭތެރޭ ހިޔާލު ތަފާތުވެ، އެ މަސައްކަތް ކޮށްދޭނެ ފަރާތެއް ވެސް ނުލިބިގެންނެވެ.
އެހެން ނަމަވެސް އައްޑޫ ސިޓީ ކައުންސިލުން ފަހުން ވަނީ ފޭދޫ ބޮޑު މަގުގެ ދެ ފަރާތުގައި ލައިޓް ޖަހަން ނިންމައި، މި މަސައްކަތް ފެނަކަ އާ ހަވާލު ކުރަން ނިންމާފައިވާ ކަމަށް ބުނެފަ އެވެ.