ފުރަތަމަ އެހީއަށް ބޭނުންވާނެ އާލާތްތަކާއެކު އެމެރިކާއިން އިންޑިއާއަށް ފޮނުވި އެހީގެ ފުރަތަމަ ޝިޕްމަންޓް އެ ޤައުމަށް ލިބިއްޖެއެވެ.
މިލިޓަރީ ބޮޑު މަތިންދާ ބޯޓެއްގައި މި ތަކެތި އިންޑިއާއަށް ގެންގޮސްފައިވަނީ މިއަދުގެ ވަގުތެއްގައެވެ. ކޮރޯނާ ވައިރަސްގެ ދެވަނަ ރާޅެއް އަރާ މުޅި ޤައުމު ހަފުސް ވަމުންދާ މި ދަނޑިވަޅުގައި ދުނިޔޭގެ އެކި ކަންކޮޅުތަކުން ދަނީ އިންޑިއާއަށް އެހީތެރިކަން ފޯރުކޮށްދެމުންނެވެ.
އެމެރިކާއިން އިންޑިއާއަށް ފޮނުވި އެހީގެ ތަކެތީގެ ތެރޭގައި، 400 އޮކްސިޖަން ސިލިންޑަރު، 960،000 ޓެސްޓް ކިޓް، 100،000 އެން95 މާސްކް، އަދި މީގެ އިތުރުން އެކި ކަހަލަ ސިއްޙީ އާލާތްތައް ހިމެނެއެވެ. މި ތަކެތި ހިފައިގެން ދިޔަ މަތިންދާ ބޯޓް ނިއު ދިއްލީ އިންޓަނޭޝަނަލް އެއަރޕޯޓަށް ޖައްސާފައިވަނީ މިއަދު ހެނދުނުގައެވެ.
ކުރިޔަށް ހުރި ދުވަސްތަކުގައި އެމެރިކާއިން އިންޑިއާއަށް 100މިލިއަން ޑޮލަރުގެ އެހީގެ ތަކެތި ފޮނުވައިދޭން އެއްބަސްވެފައިވާ ކަމަށް އިންޑިއާ ސަރުކާރުން ބުނެއެވެ. މިއީ ޒަމާންވީ ދެ ޤައުމުގެ އެކުވެރި ގުޅުން ދައްކުވައިދޭ ހެއްކެއް ކަމަށް ވެސް އިންޑިއާއިން ބުނެއެވެ. އަދި މިކަމުގެ ސަބަބުން އެ ގުޅުން އިތުރަށް ބަދަހި ވެގެންދާނެ ކަމަށް ވެސް އިންޑިއާއިން ޤަބޫލު ކުރެއެވެ.