ސަރުކާރުން އެކި ފަރާތްތަކާއި އެކު ހަދާފައިވާ އެއްބަސްވުން ތައް ބާޠިލް ކުރުމާއި ގުޅިގެން ބަދަލު ހޯދުމަށް 50 އަށް ވުރެ ގިނަ ދައުވާ ދައުލަތާއި ދެކޮޅަށް ހުށަހެޅިފައިވާ ކަމަށް ސަރުކާރުން ބުނެފިއެވެ.
ރައީސް އޮފީހުގައި ރޭ ބޭއްވެވި ނޫސްވެރިންގެ ބައްދަލުވުމެއްގައި އެ އޮފީހުގެ ލީގަލް ކައުންސެލް ޓު ދަ ޕްރެޒިޑެންޓް އަލްއުސްތާޒު އަހްމަދު އަބްދުﷲ އަފީފް ވިދާޅުވީ މިހާތަނަށް 50 އަށް ވުރެ ގިނަ ފަރާތްތަކުން ބަދަލު ހޯދުމަށް ސަރުކާރާއި ދެކޮޅަށް މައްސަލަ ހުށަހަޅާފައެވެ. ނަމަވެސް އެ މައްސަލަތަކުގައި ހިމެނެނީ ކިހާ އަދަދެއްގެ ފައިސާކަން މިވަގުތު ބުނެދޭން ނޭގޭ ކަމަށެވެ.
ސަރުކާރުން ގިނަ ބަޔަކަށް ބޮޑެތި އަދަދުން ބަދަލުދޭ ކަމަށް ދެކެވޭ ވާހަކަތަކާއި ގުޅިގެން އަހުމަދު ވިދާޅުވީ އެ ހުރިހާ ވާހަކަތަކަކީ ހަގީގަތެއް ނޫންކަމަށެވެ. އަދި މި ސަރުކާރުން ބަދަލު ދީފައިވަނީ އަދި މަދު ބަޔަކަށްކަމަށް އަހުމަދު ވިދާޅުވިއެވެ.
އަހުމަދު ވިދާޅުވީ ދައުލަތާއި އެކު ހަދާފައިވާ އެއްބަސްވުމެއް އުވާލައިގެން ލިބޭ ގެއްލުމުގެ އިންސާފު ދައުލަތުން ހޯދައި ދޭން ޖެހޭނެކަމަށެވެ. އަދި މި ސަރުކާރު އައީ އެފަދަ މައްސަލަތަކަށް ވެސް އިންސާފު ހޯދައި ދިނުމަށް ވައުދުވެގެން ކަން އަހުމަދު ފާހަގަ ކުރެެއްވިއެވެ.
އަހުމަދު ވިދާޅުވީ އިންސާފު ހޯދުމުގެ ތެރޭގައި އެންމެ މުހިންމު އެއްކަމަކީ ދައުލަތުން އެކިއެކި މީހުންނާއެކީ ވެފައިވާ އެއްބަސްވުންތައް ގާނޫނާ އަދި އެއްބަސްވުމަކާއި ހިލާފަށް ބާތިލްކޮށްފައި ހުންނަ ހާލަތުގައި އެ މީސް މީހުންނަށް ލިބުނު ގެއްލުމުގެ ބަދަލު ދިނުން ހިމެނޭ ކަމަށެވެ. ކޮންމެ ސަރުކާރެއް އަޔަސް ދައުލަތުން ބަޔަކަށް ދޭން ޖެހޭ އެއްޗެއް އޮތިއްޔާ އެ އޮންނާނެ ކަމަށާއި އެ ދޭން ޖެހޭނެކަމަށް އަހުމަދު ވިދާޅުވިއެވެ.
އަހުމަދު ވިދާޅުވީ ސަރުކާރު މަސައްކަތް ކުރަނީ ހަމައެކަނި ބަދަލު ދިނުމަށް ނޫންކަމަށާއި، މި ފަދަ މައްސަލަތަކުގައި މަސްއޫލިއްޔަތު އަދާ ކުރަންޖެހޭ ފަރާތްތަކާއި ދެކޮޅަށް ދައުވާ އުފުލާފައިވާ ކަމަށެވެ.