ލީކުވި އޭލެވެލް ފިޒިކްސް އަދި ބައިލޮޖީ ޕޭޕަރު އަލުން ހެދުމާއި މެދު އެޑެކްސެލް އާއި އެކު މަޝްވަރާ ކުރަމުން އަންނަ ކަމަށް ޑިޕާޓްމަންޓް އޮފް ޕަބްލިކް އެގްޒަމިނޭޝަން (ޑީޕީއީ) އިން ބުނެފި އެވެ.
ރާއްޖެޓީވީގެ "ފަލަ ސުރުހީ" ޕްރޮގްރާމްގައި ވާހަކަ ދައްކަވަމުން ޑީޕީއީ ހިންގުމާއި ހަވާލުވެ ހުންނެވި މުހައްމަދު އިހްސާން ވިދާޅުވީ އޭލެވެލް ފިޒިކްސް އަދި ބަޔޮލޮޖީ ޕޭޕަރު ލީކްވި މައްސަލާގައި އެޑެކްސެލް އާއި އެކު މަޝްވަރާ ކުރަމުން އަންނަ ކަމަށެވެ. އެގޮތުން ޑީޕީއީން ހުށަހަޅާފައިވަނީ އެ ދެޕޭޕަރު އަލުން ހެދުމަށްކަމަށް އިހްސާން ވިދާޅުވިއެވެ.
އިހްސާން ވިދާޅުވީ ލީކްވި ދެ ޕޭޕަރުގެ މައްސަލާގައި އެޑެކްސެލް އިން އަދި ވަކިގޮތެއް ނުނިންމާކަމަށެވެ.
އޭލެވެލް ފިޒިކްސް އަދި ބަޔޮލޮޖީ ދެ ޕޭޕަރު ވަނީ ރާއްޖޭގައި އެ ދެ އިމްތިހާނު ފެށުމުގެ ވަގުތު ކޮޅެއް ކުރިން ލީކުވެފައެވެ. ބައެއް ދަރިވަރުންނަސް ޕޭޕަރު ވަނީ ލިބިފައެވެ. މި ކަމާއި ބައެއް ބެލެނިވެރިންނާއި ސްކޫލްތަކުން ވަނީ ކަންބޮޑުވުން ފާޅުކޮށްފައެވެ.
ލީކްވި ޕޭޕަރުގެ މައްސަލާގައި މިނިސްޓްރީ އޮފް އެޑިއުކޭޝަން އިން ބުނީ އެ ޕޭޕަރުތައް ލީކްވީ ރާއްޖެއިން ނޫންކަމަށެވެ. އަދި މިކަން ކުޑަ ކުރުމަށް ޑީޕީއީ އިން ވަނީ އެޑެކްސެލް އާއި މަޝްވަރާކޮށްފައެވެ.