މިހާތަނަށް ބޮލީވުޑްގައި އުފެއްދި އެންމެ ކާމިޔާބް ފިލްމުތަކުގެ ތެރޭގައި ހިމެނޭ "ޝޯލޭ" ގެ 3ޑީ ވާޝަންގެ ޓްރެއިލާ ލޯންޗްކޮށްފި އެވެ.
އަންނަ އަހަރުގެ ޖެނުއަރީ މަހުގެ 3 ވަނަ ދުވަހު ނެރެން ހަމަޖެހިފައިވާ "ޝޯލޭ" ގެ 3ޑީ ވާޝަންގެ ޓްރެއިލާ ލޯންޗްކޮށް ދިނީ އެ ފިލްމްގެ ސްކްރީންެޕްލޭ އާއި ޑައިލޮގް ތައްޔާރު ކުރި ސަލްމާން ހާންގެ ބައްޕަ ސާލިމް ހާނާއި ޑައިރެކްޓަރު/އެކްޓަރު އަދި ޕްރޮޑިއުސަރު ފަރްހާން އަހުތަރުގެ ބައްޕަ މަޝްހޫރު ޅެންވެރިޔާ ޖާވިދް އަހްތަރެވެ.
ރަމޭޝް ސިއްޕީ 1975 ވަނަ އަހަރު ޑައިރެކްޓްކޮށް ނެރުނު "ޝޯލޭ" ގެ ތަރިންނަކީ އަމީތާބް ބައްޗަން އާއި އޭނާގެ އަންހެނުން ޖާޔާ އާއި ދަރްމެންދްރާ އާއި އޭނާގެ އަންހެނުން ހެމާ މާލިނީ އެވެ.
މީގެ އިތުރުން މި ފިލްމުގެ މަޝްހޫރު ވިލަންގެ ކެރެކްޓާ "ގައްބަރު" ގެ ރޯލުން މަރްހޫމް އަމްޖަދު ހާން ފެނިގެން ދާނެ އެވެ. އަދި ސަންޖީވް ކަޕޫރު ވެސް "ޝޯލޭ" ގެ މުހިއްމު ރޯލެއް ކުޅެފައިވެ އެވެ.
"ޝޯލޭ" އަކީ ރިލީޒް ކުރި ދުވަހުން ފެށިގެން މެދުކެނޑުމެއް ނެތި އިންޑިއާގެ ސްކްރީންތަކުގައި ދައްކަމުން ދިޔަ މަދު ފިލްމްތަކުގެ ތެރެއިން އެއް ފިލްމެވެ.
މި ފިލްމް ރިލީޒް ކުރީ އޮގަސްޓް 15، 1975 ގަ އެވެ.